સુરતના કાપોદ્રા વિસ્તારમાં આજે એક હૃદયદ્રાવક ઘટના સામે આવી છે. કાપોદ્રાના રચના સર્કલ પાસે આવેલી એક ઈમારતમાં ચાલતા એમ્બ્રોડરીના કારખાનામાં અચાનક ભીષણ આગ ફાટી નીકળી હતી. આગ એટલી વિકરાળ હતી કે જોતજોતામાં આખી ઈમારતને લપેટમાં લઈ લીધી હતી. આ દુર્ઘટનામાં અત્યાર સુધીમાં બે કામદારોના મોતની પુષ્ટિ થઈ છે, જ્યારે અનેક લોકો દાઝી જવાથી ઘાયલ થયા છે.

એમ્બ્રોડરીના કારખાનામાં ભીષણ આગ 

આગ લાગ્યાના થોડા જ સમયમાં કારખાનામાં રહેલા બે LPG ગેસ સિલિન્ડર ધડાકાભેર ફાટ્યા હતા. આ વિસ્ફોટ એટલો પ્રચંડ હતો કે આસપાસનો વિસ્તાર ધણધણી ઉઠ્યો હતો અને લોકોમાં ભાગદોડ મચી ગઈ હતી. બ્લાસ્ટને કારણે આગે વધુ રૌદ્ર સ્વરૂપ ધારણ કર્યું હતું, જેને કારણે રેસ્ક્યૂ કામગીરીમાં પણ મુશ્કેલી પડી હતી.

ફાયર બ્રિગેડનું દિલધડક રેસ્ક્યૂ

ઘટનાની જાણ થતા જ સુરત ફાયર બ્રિગેડની 10થી વધુ ગાડીઓ તાત્કાલિક ઘટનાસ્થળે પહોંચી ગઈ હતી. ઈમારતમાં ફસાયેલા કામદારોને બચાવવા માટે ફાયરના જવાનોએ જીવના જોખમે દિલધડક ઓપરેશન હાથ ધર્યું હતું. જવાનોએ ભારે જહેમત બાદ 11 જેટલા કામદારોને સુરક્ષિત બહાર કાઢી હોસ્પિટલ ખસેડ્યા હતા. ફાયર ફાઈટરોએ સતત પાણીનો મારો ચલાવી કલાકોની મહેનત બાદ આગ પર કાબૂ મેળવ્યો હતો.

જાન-માલનું નુકસાન

આ ગમખ્વાર દુર્ઘટનામાં બે વ્યક્તિઓએ પોતાના જીવ ગુમાવ્યા છે. જ્યારે 11 થી વધુ ઈજાગ્રસ્તોને સારવાર અર્થે નજીકની હોસ્પિટલમાં ખસેડવામાં આવ્યા છે, જેમાંથી કેટલાકની હાલત ગંભીર હોવાનું મનાઈ રહ્યું છે. પ્રાથમિક દ્રષ્ટિએ આગ શોર્ટ સર્કિટ કે અન્ય કારણોસર લાગી હોવાનું અનુમાન છે, પરંતુ પોલીસ અને એફએસએલની ટીમ હવે તપાસ કરી રહી છે.

આ પણ વાંચો: Vav-Tharad: સાંચોર હાઈવે પર અકસ્માત, પૂરપાટ ઝડપે આવતી સ્કોર્પિયો રિલિંગ તોડીને અથડાઈ