પોલીસ સૂત્રોએ આપેલી માહિતી પ્રમાણે જેલર એમ.એમ. ચરપોટની આગેવાનીમાં બુધવારે રાત્રે ત્રણ વાગ્યે જેલની રમઝાન બેરેકમાં ચેકિંગ હાથ ધરાયું હતું. જેલમાં બંધ કેદીઓ નમાઝ અદા કરી શકે તે માટે જેલમાં ત્રણ યાર્ડમાં ત્રણ બેરેક અલગ કરી તેને રમઝાન બેરેક તરીકે અલાયદી કરાઈ હતી. જેમાં કેદીઓ માટે ખાસ વ્યવસ્થા પણ ઉભી કરાઇ હતી.

જોકે નમાઝ અદા કરવાની આડમાં કેટલાંક કેદીઓએ મોબાઈલ ફોન લઇ આવ્યા હોવાનું અને તેઓ મોબાઈલ ફોનથી જેલની બહાર રહેતાં સંબંધીઓ તથા મળતીયાઓ સાથે બિન્દાસ્ત વાત કરતાં હોવાની માહિતીને પગલે સરપ્રાઇઝ ચેકિંગ રાખવામાં આવ્યું હતું. ચેકિંગ દરમ્યાન ત્રણેય બેરેકમાંથી સીમ કાર્ડ સાથેના મોબાઇલ ફોન મળી આવ્યા હતા.

એક ફોન ટીવી નીચેથી, બીજો ફોન બેરેકેની કોમન ટોયલેટની બાજુમાંથી તથા ત્રીજો ફોન વોશ બેસિન નીચે બનાવેલાં ખાનામાંથી મળી આવ્યો હતો. રોજાની આડમાં ફોનનો દુરૂપયોગ કરનાર કેદીઓની ઓળખ કરી ધરપકડ કરી શકાય તે માટે સચીન પોલીસ મથકે ફરિયાદ દાખલ કરાઇ હતી. ફોનમાંથી સીમકાર્ડ પણ મળ્યા હોઈ આ સીમથી કોને કોને કોલ કરાયા તેને આધારે સચીન પોલીસે એનાલિસીસ હાથ ધર્યું છે.