By Dharmesh Prajapati

વૈશ્વિક ભૌગોલિક રાજનીતિ અને આર્થિક મોરચે અમેરિકા અને ચીન વચ્ચે ચાલી રહેલી ટક્કર હવે ચરમસીમાએ પહોંચી ગઈ છે. અમેરિકાના સંરક્ષણ મંત્રાલય ‘પેન્ટાગોન’ (Pentagon) દ્વારા અલીબાબા અને બાયડુ જેવી ચીનની દિગ્ગજ ટેકનોલોજી અને ઓટોમોબાઈલ કંપનીઓને પોતાની બ્લેકલિસ્ટમાં સામેલ કરવાના આકરા નિર્ણય સામે ચીને કડક શબ્દોમાં વિરોધ નોંધાવ્યો છે.

શનિવારે ચીનના વાણિજ્ય મંત્રાલયે એક સત્તાવાર નિવેદન બહાર પાડીને જણાવ્યું છે કે તે અમેરિકાના આ પગલાથી “અત્યંત અસંતુષ્ટ” (Strongly Dissatisfied) છે અને જો ચાઈનીઝ કંપનીઓ સાથે ન્યાયી વર્તન કરવામાં નહીં આવે, તો બેઇજિંગ પણ “અચૂકપણે અને પૂરી તાકાત સાથે જવાબી આકરા પ્રહારો” (Retaliate Forcefully) કરશે.

કઈ મોટી કંપનીઓ પર પેન્ટાગોને મૂક્યો પ્રતિબંધ?

રોઇટર્સ (Reuters) ના અહેવાલ મુજબ, અમેરિકાનું માનવું છે કે ચીનની આ અગ્રણી કોમર્શિયલ કંપનીઓ પડદા પાછળ ચીની સેના (People’s Liberation Army) ને આધુનિક ટેકનોલોજી અને સંસાધનો પૂરા પાડીને મજબૂત કરી રહી છે. પેન્ટાગોનની આ નવી યાદીમાં ચીનના આર્થિક સામ્રાજ્યના સ્તંભ ગણાતા નીચેના મોટા નામો સામેલ છે:

• ઈ-કોમર્સ અને ઇન્ટરનેટ જાયન્ટ્સ: અલીબાબા (Alibaba) અને સર્ચ એન્જિન પ્રોવાઈડર બાયડુ (Baidu).
• ઇલેક્ટ્રિક વ્હીકલ (EV) ઉત્પાદકો: વિશ્વની સૌથી મોટી ઈવી કાર કંપની બીવાયડી (BYD) અને એનઆઈઓ (NIO).
• ગ્રીન એનર્જી જાયન્ટ્સ: દુનિયાની સૌથી મોટી સોલાર પેનલ બનાવતી કંપનીઓ ત્રીના સોલાર (Trina Solar) અને જેએ સોલાર (JA Solar).

ટ્રમ્પ અને શી જિનપિંગની મુલાકાત બાદ મોટો વળાંક

સૌથી આશ્ચર્યજનક બાબત એ છે કે, આ પ્રતિબંધો એવા સમયે આવ્યા છે જ્યારે તેના માત્ર એક મહિના પહેલા જ અમેરિકી રાષ્ટ્રપતિ ડોલાલ્ડ ટ્રમ્પ અને ચીનના રાષ્ટ્રપતિ શી જિનપિંગ વચ્ચે બેઇજિંગમાં એક ઉચ્ચ સ્તરીય બેઠક યોજાઈ હતી. આ બેઠકમાં બંને દેશો વચ્ચે ટ્રેડ-વોર (વ્યાપાર યુદ્ધ) પર કામચલાઉ શાંતિ જાળવવાનો નિર્ણય લેવાયો હતો.

ચીનના વિદેશ મંત્રાલયે આક્ષેપ કર્યો છે કે પેન્ટાગોનનું આ પગલું બંને વૈશ્વિક નેતાઓ વચ્ચે બનેલી પરસ્પર સંમતિ અને વિશ્વાસની ઘોર અવગણના કરે છે.

૨૦૨૭ થી અમેરિકામાં સંપૂર્ણ બહિષ્કાર

અમેરિકી કાયદા અનુસાર, પેન્ટાગોનની આ બ્લેકલિસ્ટમાં જે પણ કંપનીઓનું નામ આવી જાય છે, તેમની સાથે યુએસ ડિફેન્સ ડિપાર્ટમેન્ટ સીધો કોઈ વ્યાપારી કરાર કરી શકતું નથી. આટલું જ નહીં, વર્ષ ૨૦૨૭ થી અમેરિકી સેના કોઈપણ થર્ડ-પાર્ટી (ત્રીજી એજન્સી) દ્વારા પણ આ ચાઈનીઝ કંપનીઓની પ્રોડક્ટ્સ, સોફ્ટવેર કે સેવાઓ ખરીદી શકશે નહીં. આ કાયદાના કારણે ચાઈનીઝ કંપનીઓને અબજો ડોલરના વૈશ્વિક બિઝનેસનું નુકસાન વેઠવું પડી શકે છે.

ચીને અમેરિકાને પોતાની આ ‘ભૂલભરેલી નીતિઓ’ તાત્કાલિક રોકવા અને બંને દેશો વચ્ચે રચનાત્મક અને સ્થિર વ્યૂહાત્મક સંબંધોના સાચા માર્ગ પર પાછા ફરવા અપીલ કરી છે. નિષ્ણાતોના મતે, જો ચીન વળતો પ્રહાર કરશે તો તે અમેરિકન ટેક કંપનીઓ માટે ચીનના વિશાળ માર્કેટમાં મુશ્કેલીઓ ઊભી કરી શકે છે, જેનાથી વૈશ્વિક સપ્લાય ચેઈનને મોટો ફટકો પડશે.

કનેક્ટ વિથ ધર્મેશ પ્રજાપતિ +91 7359585035 Call / WhatsApp

Website: ambeinfotech.com

Read more on newsforyou.live