અમરેલી જિલ્લામાં વહેલી સવારે ચોટીલા-નાગેશ્રી નેશનલ હાઇવે પર એક ઓવરલોડ મગફળી ભરેલો ટ્રક પલટી ગયો હતો. આ અકસ્માત ખાંભાના નાના વિસાવદર નજીક બન્યો હતો, જેના કારણે હાઇવે પર બે કલાકથી વધુ સમય સુધી ટ્રાફિક જામ સર્જાયો હતો. સદનસીબે, ટ્રક ચાલકનો આબાદ બચાવ થયો હતો અને કોઈ જાનહાનિ થઈ ન હતી. પ્રાથમિક માહિતી અનુસાર, તળાજાથી અમરેલી તરફ જઈ રહેલો આ આઇસર ટ્રક મગફળીથી ઓવરલોડ ભરેલો હતો. વહેલી સવારે નાના વિસાવદર પાસેથી પસાર થતી વખતે ટ્રકે અચાનક પલટી મારી હતી. ટ્રક પલટી મારતા મગફળીના બાચકા રોડ પર વેરવિખેર થઈ ગયા હતા. રોડ પર મગફળી ફેલાઈ જવા અને ટ્રક આડો પડવાને કારણે મોટા વાહનો જેવા કે ટ્રક અને બસને પસાર થવામાં ભારે મુશ્કેલી પડી હતી. આ સ્થિતિને કારણે હાઇવે પર થોડા સમય માટે ટ્રાફિક જામ સર્જાયો હતો, જેનાથી વાહનચાલકોને ભારે હાલાકી ભોગવવી પડી હતી. અકસ્માતની જાણ થતાં જ સ્થાનિક તંત્ર દ્વારા તાત્કાલિક કાર્યવાહી હાથ ધરવામાં આવી હતી. જેસીબી મશીન બોલાવીને પલટી ગયેલા ટ્રકને હટાવવામાં આવ્યો હતો અને રોડ પર ફેલાયેલી મગફળીને પણ દૂર ખસેડવામાં આવી હતી. આ કામગીરી બાદ લગભગ બે કલાકથી વધુ સમય પછી વાહનવ્યવહાર ફરીથી રાબેતા મુજબ શરૂ થયો હતો.