ડાયમંડ સિટી સુરતના હજીરા વિસ્તારમાં આવેલા મોરા ગામમાં પેસેન્જર વાહન ચાલકોના આતંકનો વધુ એક કિસ્સો પ્રકાશમાં આવ્યો છે. અહીં બેફામ ગતિએ દોડતી એક ઇકો કારે નિર્દોષ રાહદારીને અડફેટે લેતા સમગ્ર પંથકમાં ચકચાર મચી જવા પામી છે. આ ભયાનક અકસ્માતની સમગ્ર ઘટના નજીકમાં લાગેલા સીસીટીવી કેમેરામાં કેદ થઈ ગઈ છે.
સીસીટીવીમાં કેદ થયો જીવલેણ અકસ્માત
મોરા ગામમાં પેસેન્જર ભરવા માટેની હોડમાં ઈકો કાર ચાલકો અને અન્ય વાહન ચાલકો નિયમોનું સરેઆમ ઉલ્લંઘન કરી રહ્યા છે. સીસીટીવી ફૂટેજમાં જોઈ શકાય છે કે, એક રાહદારી રસ્તો ઓળંગી રહ્યો હતો અથવા સાઈડમાં હતો ત્યારે જ પૂરપાટ ઝડપે આવતી એક ઇકો કારે તેને જોરદાર ટક્કર મારી હતી. ટક્કર એટલી પ્રચંડ હતી કે, રાહદારી હવામાં ફંગોળાયો હતો.
સ્થાનિકોમાં ભારે રોષ અને પોલીસ પાસે માગ
આ ઘટનાને પગલે મોરા ગામના ગ્રામજનોમાં ભારે રોષ જોવા મળી રહ્યો છે. ગ્રામવાસીઓનો આક્ષેપ છે કે, હજીરા વિસ્તારમાં પેસેન્જર વાહનો ચલાવતા તત્વો માનવ જિંદગીની પરવા કર્યા વગર વાહનો હંકારે છે. રસ્તાઓ પર પગપાળા ચાલવું પણ હવે જોખમી બની ગયું છે. સ્થાનિકોએ માગ કરી છે કે, પોલીસ આ પંથકમાં પેટ્રોલિંગ વધારે અને બેફામ વાહન હંકારતા આવા અસામાજિક તત્ત્વો પર કડક લગામ લગાવે જેથી ભવિષ્યમાં કોઈ મોટી જાનહાનિ ન થાય.