રાજ્યની સૌથી સુરક્ષિત ગણાતી અમદાવાદ સાબરમતી સેન્ટ્રલ જેલ અત્યારે એક અલગ જ કારણસર ચર્ચામાં છે. સાબરમતી જેલમાં કેદીઓના માનસિક સુધાર અને આધ્યાત્મિક વિકાસ માટે એક અનોખી પહેલના ભાગરૂપે પ્રથમ વખત શિવકૃપાનંદ સ્વામીજીના પ્રત્યક્ષ સાંનિધ્યમાં ત્રણ દિવસીય ‘હિમાલયીન સમર્પણ ધ્યાનયોગ’ શિબિરનું ભવ્ય આયોજન કરવામાં આવ્યું હતું.

શાંતિ અને આત્મચિંતનનો માર્ગ

આ શિબિરનો મુખ્ય ઉદ્દેશ્ય કેદીઓને ગુનાહિત માનસિકતામાંથી બહાર લાવી આંતરિક શાંતિ અને આત્મચિંતન તરફ વાળવાનો હતો. શિબિર દરમિયાન શિવકૃપાનંદ સ્વામીજીએ કેદીઓ અને જેલ સ્ટાફને ધ્યાનયોગની ગૂઢ વાતો સરળ શૈલીમાં સમજાવી હતી. આ શિબિરમાં મોટી સંખ્યામાં કેદીઓએ જોડાઈને પોતાના જીવનના નકારાત્મક પાસાઓને દૂર કરવાના શપથ લીધા હતા.

ઉત્સાહપૂર્ણ પ્રતિસાદ

શિબિર શરૂ થતા પહેલા એક વિશેષ પ્રદર્શન યોજવામાં આવ્યું હતું, જેમાં 400 થી વધુ કેદીઓ અને જેલ સ્ટાફે મુલાકાત લઈને ધ્યાનયોગની પદ્ધતિઓ વિશે પ્રાથમિક જાણકારી મેળવી હતી. શિબિરના અંતિમ દિવસે જેલના ઉચ્ચ અધિકારીઓની ઉપસ્થિતિમાં કેદીઓના બદલાયેલા ચહેરા અને શાંત ચિત્તે આ આયોજનની સફળતાની પ્રતીતિ કરાવી હતી.

ડીવાયએસપીનું નિવેદન

અમદાવાદ મધ્યસ્થ જેલના ડીવાયએસપી પરેશ સોલંકીએ આ અંગે વિગતો આપતા જણાવ્યું હતું કે, કેદીઓ જ્યારે જેલમાંથી બહાર જાય ત્યારે એક સારા નાગરિક તરીકે સમાજમાં પુનઃસ્થાપિત થાય તે અમારો મુખ્ય લક્ષ્યાંક છે. ધ્યાનયોગ જેવી પ્રવૃત્તિઓ તેમનામાં માનસિક પરિવર્તન લાવવા માટે અત્યંત મહત્વપૂર્ણ સાબિત થાય છે. આ પ્રકારના કાર્યક્રમોથી જેલનું વાતાવરણ પણ વધુ સકારાત્મક બન્યું હોવાનું તેમણે ઉમેર્યું હતું.

આ પણ વાંચો – Ahmedabadના લાલ દરવાજા પાસે કારચાલકનો આતંક: લાયસન્સ વગર ત્રણ વાહનોને ઉડાવ્યા