ઇન્ડિયન પ્રીમિયર લીગ (IPL) ની 19મી સીઝનનો પ્રારંભ 28 માર્ચથી થવા જઈ રહ્યો છે. બેંગલુરુના એમ. ચિન્નાસ્વામી સ્ટેડિયમ ખાતે RCB અને SRH વચ્ચેના મુકાબલાથી આ ધમાકેદાર ટુર્નામેન્ટ શરૂ થશે. જોકે, આ સીઝન માત્ર ચોગ્ગા-છગ્ગા માટે જ નહીં, પરંતુ કેટલાક દિગ્ગજ ખેલાડીઓની વિદાય માટે પણ યાદગાર બની શકે છે. ફિટનેસ, વધતી ઉંમર અને આંતરરાષ્ટ્રીય શેડ્યૂલને જોતાં આ પાંચ ખેલાડીઓ માટે 2026ની સીઝન છેલ્લી હોવાની પ્રબળ શક્યતા છે.
1. મહેન્દ્ર સિંહ ધોની (CSK)
IPL ના ઇતિહાસના સૌથી સફળ કેપ્ટન MS ધોની જુલાઈ 2026 માં 45 વર્ષના થશે. ઘૂંટણની તકલીફ છતાં ધોની ચાહકો માટે મેદાનમાં ઉતરી રહ્યા છે. જોકે, આ વખતે માનવામાં આવે છે કે ‘થાલા’ ચેન્નાઈના ફેન્સને ભાવનાત્મક વિદાય આપી શકે છે.
2. સુનિલ નારાયણ (KKR):
કોલકાતા નાઈટ રાઈડર્સનો આ મિસ્ટ્રી સ્પિનર અને વિસ્ફોટક ઓપનર હવે 38 વર્ષનો થવા જઈ રહ્યો છે. આંતરરાષ્ટ્રીય ક્રિકેટમાંથી પહેલેથી જ નિવૃત્ત થયેલા નારાયણ માટે ફિટનેસના પડકારો વધી રહ્યા છે, જે તેને નિવૃત્તિ તરફ દોરી શકે છે.
3. ઇશાંત શર્મા (GT)
ભારતના અનુભવી ફાસ્ટ બોલર ઇશાંત શર્મા હાલમાં ગુજરાત ટાઇટન્સનો ભાગ છે. 37 વર્ષની ઉંમરે અને યુવા ફાસ્ટ બોલરોની વધતી સ્પર્ધા વચ્ચે ઇશાંત માટે આ IPL સીઝન કરિયરની અંતિમ લીગ સાબિત થઈ શકે છે.
4. અજિંક્ય રહાણે (KKR)
IPL માં 5,000 થી વધુ રન બનાવનાર ક્લાસિક બેટ્સમેન અજિંક્ય રહાણે જૂનમાં 38 વર્ષના થશે. આ સીઝનમાં KKR ના નેતૃત્વની જવાબદારી સાથે રહાણે પોતાની શાનદાર સફરનો અંત લાવી શકે છે.
5. મિશેલ સ્ટાર્ક (DC)
ઓસ્ટ્રેલિયાના ઘાતક બોલર મિશેલ સ્ટાર્ક હવે દિલ્હી કેપિટલ્સ સાથે જોડાયા છે. ટેસ્ટ અને વન-ડે પર ધ્યાન કેન્દ્રિત કરવા અને વર્કલોડ ઘટાડવા માટે સ્ટાર્ક IPL 2026 બાદ આ ટૂંકા ફોર્મેટને હંમેશા માટે અલવિદા કહી શકે છે.