ઈંગ્લેન્ડની 100-બોલ લીગ, ધ હંડ્રેડ માટે ઓક્શનમાં પાકિસ્તાની ખેલાડીઓને લઈને ચાલી રહેલી અટકળોનો આખરે અંત આવ્યો જ્યારે પાકિસ્તાનના મિસ્ટ્રી સ્પિનરને IPL સાથે સીધી રીતે જોડાયેલી ફ્રેન્ચાઈઝી દ્વારા ખરીદવામાં આવ્યો.

આ સિંગલ ડીલે માત્ર ઓક્શનના વાતાવરણને ગરમાવો આપ્યો નહીં પરંતુ અંગ્રેજી મીડિયામાં ફરતા રિપોર્ટનો પણ ખોટા સાબિત કર્યા કે IPL સાથે જોડાયેલા માલિકો પાકિસ્તાની ખેલાડીઓને ખરીદશે નહીં.

પાકિસ્તાનના મિસ્ટ્રી સ્પિનર ​​અબરાર અહેમદને સનરાઈઝર્સ લીડ્સે 190,000 પાઉન્ડ એટલે કે લગભગ 2.34 કરોડ રૂપિયામાં ખરીદ્યો હતો. આ ફ્રેન્ચાઈઝી સનરાઇઝર્સ હૈદરાબાદ ગ્રુપની માલિકીની છે, જેની સહ-માલિકી કાવ્યા મારન ધરાવે છે. ધ હંડ્રેડ ઓક્શન પહેલા એવા રિપોર્ટ હતા કે IPL ટીમો પાકિસ્તાની ખેલાડીઓ ખરીદશે નહીં. આ સમાચાર બાદ ઈંગ્લેન્ડ અને વેલ્સ ક્રિકેટ બોર્ડને નિવેદન જાહેર કરવાની ફરજ પડી હતી.

આ ટીમમાં જોડાયો ઉસ્માન તારિક

આ પહેલા અન્ય એક પાકિસ્તાની મિસ્ટ્રી સ્પિનર ઉસ્માન તારિક ઓક્શનમાં બોલી લાગેલો પ્રથમ પાકિસ્તાની ખેલાડી બન્યો હતો. તેને બર્મિંગહામ ફોનિક્સ દ્વારા 140,000 પાઉન્ડ અથવા આશરે 1.72 કરોડ રૂપિયામાં ખરીદવામાં આવ્યો હતો. આ પછી સૌથી વધુ ચર્ચાસ્પદ ડીલ અબરાર અહેમદની હતી, જે ટ્રેન્ટ રોકેટ્સ સાથે જોરદાર બોલી લડાઈમાં સામેલ હતો અને અંતે સનરાઈઝર્સ લીડ્સે બોલી જીતી લીધી.

ઓક્શન પહેલા બીબીસીના એક રિપોર્ટમાં એવો દાવો કરવામાં આવ્યો હતો કે IPL ટીમો ધરાવતી ફ્રેન્ચાઈઝ માલિકો પાકિસ્તાની ખેલાડીઓ ખરીદશે નહીં. ધ હંડ્રેડમાં 8 ટીમોમાંથી 4 આઈપીએલ સાથે જોડાયેલા જૂથોની માલિકીની છે. આમાં એમઆઈ લંડન, સનરાઈઝર્સ લીડ્સ, સધર્ન બ્રેવ અને માન્ચેસ્ટર સુપર જાયન્ટ્સનો સમાવેશ થાય છે. પરંતુ સનરાઈઝર્સ લીડ્સે અબરાર અહેમદને સાઈન કરીને આ અટકળોને સંપૂર્ણપણે ખોટી સાબિત કરી.

ઘણા મોટા પાકિસ્તાની ખેલાડીઓ રહ્યા અનસોલ્ડ

ધ હંડ્રેડ ઓક્શન દરમિયાન પાકિસ્તાનના ઘણા મોટા નામોને હજુ સુધી ખરીદદારો મળ્યા નથી. આમાં ફાસ્ટ બોલર હારિસ રૌફ, ઓલરાઉન્ડર શાદાબ ખાન અને યુવા બેટ્સમેન સૈમ અયુબનો સમાવેશ થાય છે. સ્ટાર ફાસ્ટ બોલર શાહીન આફ્રિદીએ ઓક્શન શરૂ થાય તે પહેલાં પોતાનું નામ પાછું ખેંચી લીધું હતું.

આ પણ વાંચો: Suryakumar Yadav, હાર્દિક પંડ્યા અને શિવમ દુબેએ છોડ્યો ટીમ ઈન્ડિયાનો સાથ, BCCI પર ઉઠ્યા સવાલો!