ગઢડા તાલુકાના અડતાળા ગામે પશુપાલકની ગાયનું મૃત્યુ થતાં તેને હિંદુ સંસ્કાર મુજબ વિધિવત સમાધિ આપવામાં આવી હતી. આ ઘટનામાં પરિવારજનો અને ગ્રામજનો ઉપસ્થિત રહ્યા હતા. છેલા સાટીયાએ આ ગાયને વર્ષો સુધી પરિવારના સભ્ય સમાન રાખી હતી. ગાયના મૃત્યુ બાદ તેમણે ગૌમાતાને સન્માન આપવા માટે સંપૂર્ણ વિધિવત રીત-રિવાજો સાથે અંતિમ સંસ્કાર કર્યા હતા. અંતિમ સંસ્કાર દરમિયાન ગાયને ફૂલોની હાર પહેરાવવામાં આવી હતી. ધૂપ-દીવો પ્રગટાવી પ્રાર્થના સાથે તેને સમાધિ અપાઈ હતી. ગ્રામજનોના મતે, ગાય પ્રત્યેનું આ સન્માન ભારતીય સંસ્કૃતિમાં ગૌમાતાને અપાતા સ્થાન અને સદ્ભાવનાનો સંદેશ આપે છે. આ ઘટના પશુઓ પ્રત્યે કરુણા અને દયાની ભાવનાનું ઉદાહરણ પૂરું પાડે છે.