બોટાદના રાણપુર ખાતે કોળી સેનાએ આમ આદમી પાર્ટી (AAP) ના નેતા બ્રિજરાજ સોલંકીની ટિપ્પણી સામે વિરોધ નોંધાવ્યો છે. ધારાસભ્ય હિરાભાઈ સોલંકીની હડદડ મુલાકાતને રાજકીય ગણાવતી ટિપ્પણીના વિરોધમાં પત્રકાર પરિષદ યોજવામાં આવી હતી, જેમાં AAP નેતા વિરુદ્ધ સૂત્રોચ્ચાર કરાયા હતા. બે દિવસ અગાઉ AAP નેતા બ્રિજરાજ સોલંકીએ બોટાદના હડદડ ગામે પીડિત પરિવારોની મુલાકાત લીધી હતી. તેમણે ધારાસભ્ય હિરાભાઈ સોલંકી અને દિવ્યેશ સોલંકી દ્વારા લેવાયેલી મુલાકાતને રાજકીય ગણાવી હતી, જેના કારણે કોળી સમાજમાં નારાજગી વ્યાપી હતી. બોટાદ જિલ્લા કોળી સેનાના અધ્યક્ષ કેશુભાઈ પંચાળા અને રાણપુર તાલુકા પંચાયતના પૂર્વ પ્રમુખ વિનોદભાઈ સોલંકી સહિતના આગેવાનોએ આ ટિપ્પણીની સખત નિંદા કરી હતી. તેમણે સ્પષ્ટતા કરી કે ધારાસભ્ય હિરાભાઈ સોલંકીની હડદડ મુલાકાત રાજકીય ન હતી, પરંતુ સમાજના પ્રમુખ તરીકે તેમણે પીડિતોની મુલાકાત લીધી હતી. કેશુભાઈ પંચાળા અને વિનોદભાઈ સોલંકીએ જણાવ્યું હતું કે બ્રિજેશ સોલંકી પોતાના રાજકીય સ્વાર્થ માટે પુરૂષોત્તમભાઈ સોલંકી અને હિરાભાઈ સોલંકી જેવા કોળી સમાજના મજબૂત નેતાઓને નિશાન બનાવી રહ્યા છે. તેમણે ચેતવણી આપી હતી કે પુરૂષોત્તમભાઈ સોલંકી, હિરાભાઈ સોલંકી અને દિવ્યેશ સોલંકી વિરુદ્ધ ટિપ્પણી કરનારને માફ કરવામાં આવશે નહીં અને જરૂર પડ્યે કોળી સમાજ યોગ્ય જવાબ આપશે. આ પત્રકાર પરિષદમાં બોટાદ જિલ્લા કોળી સેનાના અધ્યક્ષ કેશુભાઈ પંચાળા, રાણપુર તાલુકા પંચાયતના પૂર્વ પ્રમુખ વિનોદભાઈ સોલંકી સહિત મોટી સંખ્યામાં કોળી સમાજના આગેવાનો અને સભ્યો ઉપસ્થિત રહ્યા હતા.