જિલ્લાના સિહોર ખાતે ગત રાત્રે એક ગમખ્વાર માર્ગ અકસ્માતની ઘટના સામે આવી છે, જેમાં એક યુવકનું ઘટનાસ્થળે જ કરૂણ મોત નીપજ્યું છે. આ અકસ્માત સિહોરના વિજય પેલેસ નજીક સર્જાયો હતો.

સિહોરમાં અકસ્માતમાં એકનું મોત

પ્રાપ્ત માહિતી અનુસાર, મૃતક યુવકનું નામ ચેતન બાલાભાઈ કોતર હોવાનું જાણવા મળ્યું છે. ચેતન કોતરને કોઈ અજાણ્યા વાહન ચાલકે જોરદાર ટક્કર મારી હતી. અકસ્માત એટલો ભયાનક હતો કે યુવકનું ઘટનાસ્થળે જ કમકમાટીભર્યું મોત થયું હતું.અકસ્માત સર્જીને અજાણ્યો વાહન ચાલક પોતાનું વાહન લઈને તાત્કાલિક સ્થળ પરથી નાસી છૂટ્યો હતો.

અજાણ્યા વાહન ચાલકની અડફેટે યુવકનું મોત

ઘટનાની જાણ થતાં જ સિહોર પોલીસ તાત્કાલિક સ્થળ પર પહોંચી હતી. પોલીસે મૃતદેહનો કબજો મેળવીને પોસ્ટમોર્ટમ માટે હોસ્પિટલ ખસેડ્યો હતો. પોલીસે અજાણ્યા વાહન ચાલક વિરુદ્ધ ગુનો નોંધીને તેને ઝડપી પાડવા માટે તપાસના ચક્રો ગતિમાન કર્યા છે. પોલીસે આસપાસના સીસીટીવી ફૂટેજ અને અન્ય માહિતીના આધારે નાસી છૂટેલા વાહન અને તેના ચાલકને શોધવાની તજવીજ હાથ ધરી છે. યુવક ચેતન કોતરના આ અકાળે અવસાનથી તેના પરિવારમાં અને મિત્ર વર્તુળમાં શોકનો માહોલ છવાઈ ગયો છે. આ દુઃખદ ઘટનાએ વિસ્તારમાં ગમગીની ફેલાવી દીધી છે.