વડોદરા નજીક આવેલી નંદેસરી જી.આઈ.ડી.સી. (GIDC) માં આજે અચાનક ગેસ લાઈન લીકેજ થવાના કારણે ભીષણ આગ ફાટી નીકળી હતી. ગેસના ઊંચા દબાણને કારણે આગની જ્વાળાઓ આકાશમાં દૂર-દૂર સુધી જોવા મળી હતી, જેના કારણે આસપાસની કંપનીઓમાં કામ કરતા શ્રમિકો અને સ્થાનિકોમાં ભારે ફફડાટ વ્યાપી ગયો હતો.

તંત્રએ તાત્કાલિક ગેસ લાઈન બંધ કરી

આગની ઘટનાની જાણ થતા જ નંદેસરી ફાયર બ્રિગેડની ટીમ તાત્કાલિક ઘટનાસ્થળે દોડી ગઈ હતી. પરિસ્થિતિની ગંભીરતાને જોતા તંત્ર દ્વારા સૌથી પહેલા જે-તે વિસ્તારની મુખ્ય ગેસ લાઈનનો પુરવઠો બંધ કરી દેવામાં આવ્યો હતો. ગેસ સપ્લાય કટ થવાને કારણે આગ વધુ ફેલાતી અટકી હતી અને ફાયર ફાયટરોએ ભારે જહેમત બાદ જ્વાળાઓ પર કાબૂ મેળવ્યો હતો.

સદનસીબે કોઈ મોટી જાનહાનિ થઈ નથી

આ ભીષણ આગમાં રાહતના સમાચાર એ છે કે કોઈ પણ પ્રકારની જાનહાનિ નોંધાઈ નથી. જોકે, ગેસ લાઈનમાં લીકેજ કયા કારણોસર થયું – કુદરતી ઘસારો હતો કે કોઈ ટેકનિકલ ખામી – તે અંગે તપાસ શરૂ કરવામાં આવી છે. સાવચેતીના ભાગરૂપે હાલમાં અસરગ્રસ્ત વિસ્તારમાં સમારકામ ચાલી રહ્યું છે અને ત્યાં સુધી વીજ પુરવઠો અને અવરજવર પર નિયંત્રણ મુકવામાં આવ્યું છે.

ગુજરાતના વધુ સમાચાર વાંચવા માટે ક્લિક કરો