મહેસાણા જિલ્લાના વિજાપુરમાં 8 વર્ષની બાળકીને અજાણ્યા શખ્સ દ્વારા ઇન્જેક્શન આપવામાં આવવાના ગંભીર મામલે સ્થાનિકોમાં ઉગ્ર રોષ જોવા મળી રહ્યો છે. ન્યાયની માંગણી સાથે આજે વિજાપુરના વેપારીઓએ બજાર બંધ પાળીને વિરોધ પ્રદર્શિત કર્યો છે. વિરોધના ભાગરૂપે જુના બજાર, ટાવર બજાર અને ખત્રીકુવા સુધીના મુખ્ય વિસ્તારો સંપૂર્ણપણે બંધ રાખવામાં આવ્યા છે.
12 કલાકમાં આરોપીની ધરપકડ કરવાની માંગ
વિરોધકર્તાઓએ પોલીસ સમક્ષ માંગ કરી છે કે 12 કલાકની અંદર આરોપીની ઓળખ કરીને તેની ધરપકડ કરવામાં આવે. સ્થિતિની ગંભીરતાને ધ્યાનમાં રાખીને વિજાપુરમાં પોલીસ તંત્ર સજ્જ બન્યું છે અને સંવેદનશીલ ગણાતા સ્વામિનારાયણ સ્કૂલ આગળ સઘન પોલીસ બંદોબસ્ત ગોઠવી દેવામાં આવ્યો છે. પોલીસ દ્વારા આરોપીને વહેલી તકે પકડવા માટે તપાસની ગતિ તેજ કરવામાં આવી છે.