સુરેન્દ્રનગર જિલ્લામાં કૃષ્ણ જન્માષ્ટમીનો તહેવાર ખુશી અને ભક્તિભાવ સાથે ઉજવાયો. શહેરથી લઈને વઢવાણ સુધીના મંદિરો અને ધાર્મિક સ્થળોએ ખાસ કાર્યક્રમો થયા. આ પ્રસંગે નાના બાળકો બાળ કૃષ્ણના રૂપમાં સજીને ઉજવણીમાં જોડાયા હતા. આ ઉજવણીમાં 12 વર્ષના તેજસ ઉતેરીયાએ નટખટ કાનકુવર બનીને સૌના દિલ જીતી લીધા. તેણે કૃષ્ણના વેશમાં સજીને ભગવાન પ્રત્યેની પોતાની ભક્તિ બતાવી. બાળ કૃષ્ણના મનમોહક સ્વરૂપે બનેલા તેજસ સહિત લોકોમાં કૃષ્ણ ભક્તિનો ઘણો ઉત્સાહ જોવા મળ્યો. વિવિધ જગ્યાએ નાના બાળકો કૃષ્ણ-રાધાના વેશમાં દેખાતા જન્માષ્ટમીનું વાતાવરણ વધુ રંગીન અને ભક્તિમય બન્યું હતું. વઢવાણ શહેરમાં દર વર્ષની જેમ આ વર્ષે પણ શ્રીકૃષ્ણ જન્માષ્ટમીની ઉજવણી કરાઈ. જન્માષ્ટમી નિમિત્તે વઢવાણના મોતીચોક ખાતે આવેલા મુરલી મનહર મંદિરેથી શોભાયાત્રા નીકળી. આ શોભાયાત્રા શહેરના મુખ્ય રસ્તાઓ અને વિસ્તારોમાંથી પસાર થઈ હતી. શોભાયાત્રામાં મોટી સંખ્યામાં ભક્તો જોડાયા હતા. ટ્રેક્ટરો, ગાડાઓ અને વિવિધ ધાર્મિક-સાંસ્કૃતિક ટેબ્લો આકર્ષણનું કેન્દ્ર બન્યા. ભગવાન શ્રીકૃષ્ણના જીવન પ્રસંગો અને ધાર્મિક સંદેશ આપતા ટેબ્લો સાથે ભક્તિમય વાતાવરણમાં શોભાયાત્રા આગળ વધી. ધારાસભ્ય જગદીશભાઈ મકવાણા, પૂર્વ ધારાસભ્ય ધનરાજભાઈ કેલા, સ્મિતાબેન રાવલ સહિતના નેતાઓ શોભાયાત્રામાં જોડાયા હતા. જન્માષ્ટમીની ઉજવણીમાં પરંપરાગત મટકી ફોડ કાર્યક્રમ પણ યોજાયો. મટકી ફોડ દરમિયાન યુવાનો અને ભક્તોમાં ઘણો ઉત્સાહ જોવા મળ્યો. ‘જય શ્રીકૃષ્ણ’ અને ‘નંદ ઘેર આનંદ ભયો’ જેવા જયઘોષથી આખું વઢવાણ શહેર ભક્તિના રંગે રંગાઈ ગયું. વઢવાણની ધોળીપોળ ખાતે આવેલા રામમહેલ મંદિર પાસે રામી માળી સમાજ દ્વારા છેલ્લા 30 વર્ષથી શ્રીકૃષ્ણ જન્માષ્ટમી નિમિત્તે પરંપરાગત મટકી ફોડ કાર્યક્રમ થાય છે. આ વર્ષે પણ તેનું આયોજન કરાયું. આ મટકી ફોડ કાર્યક્રમમાં મોટી સંખ્યામાં ભક્તો અને યુવાનો જોડાયા. શોભાયાત્રાનું સ્થાનિક લોકોએ ભાવપૂર્વક સ્વાગત કર્યું. પરિવારો સાથે લોકો શોભાયાત્રાના દર્શન કરવા ઉમટી પડ્યા હતા. ભક્તોએ ભગવાન શ્રીકૃષ્ણના દર્શન કરીને ધન્યતા અનુભવી. શોભાયાત્રામાં ભગવાન શ્રીકૃષ્ણના વિવિધ સ્વરૂપો, ધાર્મિક ટેબ્લો, ભજન-કીર્તન અને મટકી ફોડ જેવા કાર્યક્રમોએ સૌનું ધ્યાન ખેંચ્યું. ખાસ કરીને બાળ કૃષ્ણના વેશમાં સજેલા બાળકો લોકો માટે આકર્ષણનું કેન્દ્ર બન્યા. આખું શહેર કૃષ્ણમય બની ગયું હતું.