સુરત શહેરના લીંબાયત વિસ્તારમાં ઓનલાઈન સાયબર ક્રાઈમ અને બ્લેકમેલિંગનો એક ચોંકાવનારો કિસ્સો પ્રકાશમાં આવ્યો છે. એક સ્થળ પર ડાન્સ ક્લાસ ચલાવતા ડાન્સ ટીચર સોશિયલ મીડિયા પર ચાલી રહેલી ઓનલાઈન હનીટ્રેપની જાળમાં ફસાઈ જતાં મોટી આર્થિક છેતરપિંડીનો ભોગ બન્યા છે. અજાણી મહિલાએ ઇન્સ્ટાગ્રામ પર મિત્રતા કેળવ્યા બાદ ન્યૂડ વીડિયો કોલિંગ દ્વારા શિક્ષકને પોતાની જાળમાં ફસાવી લીધા હતા અને કોલનું રેકોર્ડિંગ કરી લીધું હતું.

નકલી DCP બની વીડિયો ડિલીટ કરવાના નામે રૂ.1.33 લાખ પડાવ્યા

પ્રાપ્ત વિગતો અનુસાર, પીડિત ડાન્સ ટીચરને ‘પૂજા કુમારી’ નામની ઇન્સ્ટાગ્રામ આઈડી પરથી મેસેજ આવ્યો હતો. વાતચીત વધ્યા બાદ આરોપીઓએ ન્યૂડ વિડીયો કોલનું રેકોર્ડિંગ કરી લીધું હતું અને તેને વાયરલ કરવાની ધમકી આપીને બ્લેકમેલ કરવાનું શરૂ કર્યું હતું. આ દરમિયાન સંજય સિંહ નામના એક શખ્સે પોતાની ઓળખ ઉચ્ચ પોલીસ અધિકારી (DCP) તરીકે આપી હતી અને વીડિયો સોશિયલ મીડિયા પરથી હટાવવાના બહાને ડાન્સ ટીચર પાસેથી તબક્કાવાર રૂ.1.33 લાખની માતબર રકમ પડાવી લીધી હતી.

ભોગ બનનારે લીંબાયત પોલીસ મથકે ફરિયાદ નોંધાવી, તપાસ શરૂ

સતત વધી રહેલી નાણાંની માગણી અને બ્લેકમેલિંગની ધમકીઓથી કંટાળીને આખરે ભોગ બનનાર ડાન્સ ટીચરે લીંબાયત પોલીસ મથકમાં પહોંચીને આપવીતી જણાવી હતી. પોલીસે આ અંગે અજાણ્યા સાયબર ઠગો સામે ગુનો નોંધી કાયદેસરની તપાસ હાથ ધરી છે. આ ઉપરાંત ટેકનિકલ સર્વેલન્સ અને સાયબર સેલની મદદથી આ કૌભાંડ આચરનાર ફેક ઇન્સ્ટાગ્રામ આઈડી તથા નકલી અધિકારી બનીને ફોન કરનાર ઇસમોને ઝડપી પાડવા માટે પોલીસે ચક્રો ગતિમાન કર્યા છે.

આ પણ વાંચો : Ahmedabadમાં 14 વર્ષીય સગીરાને પ્રેમજાળમાં ફસાવનાર વિધર્મી યુવક ઝડપાયો! કૃષ્ણનગરમાં POCSOની નોંધાઈ ફરિયાદ