સુરત જિલ્લાના માંગરોળ તાલુકામાં આવેલી ‘ગુજરાત વુડ’ નામની પ્લાયવુડ બનાવતી જાણીતી કંપનીમાં અચાનક જ ભયાનક આગ લાગવાની ઘટના સામે આવી છે. કંપની પરિસરમાં અચાનક ધુમાડાના ગોટેગોટા નીકળતા જોતા જ કામદારો અને કર્મચારીઓમાં ભારે અફરાતફરી મચી ગઈ હતી.

બોઇલર પાસે રાખેલા લાકડામાં લાગી આગ

મળતી પ્રાથમિક વિગતો અનુસાર, કંપનીમાં આવેલા બોઇલર વિભાગની બિલકુલ બાજુમાં જ મોટા પ્રમાણમાં લાકડાનો જથ્થો રાખવામાં આવ્યો હતો. આ બોઇલર નજીકથી કોઈ કારણોસર તણખાં કે ગરમી પકડાવવાના કારણે બાજુમાં પડેલા લાકડામાં અચાનક આગ ભભૂકી ઊઠી હતી. લાકડું હોવાને કારણે આગે જોતજોતામાં રૌદ્ર સ્વરૂપ ધારણ કરી લીધું હતું.

માટીવા ફાયર ટીમે ઘટના સ્થળે પહોંચી આગ પર કાબૂ મેળવ્યો

આગની ઘટના અંગે તુરંત જ ફાયર બ્રિગેડને જાણ કરવામાં આવી હતી. ઘટનાની ગંભીરતાને ધ્યાને લઈને માટીવા ફાયર સ્ટેશનની ટીમ તાત્કાલિક ઘટના સ્થળે બંબા સાથે દોડી આવી હતી. ફાયર ફાઇટરોએ સતત પાણીનો મારો ચલાવીને સમયસર આગ પર સંપૂર્ણ કાબૂ મેળવી લીધો હતો, જેથી એક મોટી હોનારત ટળી હતી.

સલામતીના પગલે કોઈ જાનહાની નહીં

આગ લાગતા જ કંપનીમાં કામ કરી રહેલા તમામ કર્મચારીઓને ત્વરિત સુરક્ષિત રીતે બહાર નીકાળી લેવામાં આવ્યા હતા, જેના કારણે સદનસીબે કોઈ મોટી જાનહાની કે ઈજાના અહેવાલ પ્રાપ્ત થયા નથી. જોકે, પ્લાયવુડ અને લાકડાનો જથ્થો બળીને ખાખ થઈ જતાં કંપનીને લાખો રૂપિયાનું આર્થિક નુકસાન થયું હોવાનું અનુમાન છે.

આ પણ વાંચો: Suratમાં જન્માષ્ટમીએ જુગારધામો પર દરોડા! વરાછામાંથી પોલીસે 4 સ્થળોએ દરોડા પાડી 30 જુગારીઓને દબોચ્યા