પશ્ચિમ રેલવેનું ભાવનગર મંડળ યાત્રીઓને સારી સુવિધાઓ આપવાની સાથે રેલવે સ્ટેશનો પર કામ કરતા કર્મચારીઓ અને સહયોગી વર્ગોના ભલા અને સન્માન માટે સતત પ્રયાસો કરે છે. આ જ ક્રમમાં, કૃષ્ણ જન્માષ્ટમી પર્વ નિમિત્તે 1 સપ્ટેમ્બર, 2026ના રોજ ભાવનગર ટર્મિનસ સ્ટેશન પર કામ કરતા યાત્રી સહાયકો (કુલી)ના સન્માન માટે એક ખાસ કાર્યક્રમ રાખવામાં આવ્યો હતો. ભાવનગર મંડળના વરિષ્ઠ મંડળ વાણિજ્ય પ્રબંધક અતુલ કુમાર ત્રિપાઠીએ જણાવ્યું કે, રોટરી ક્લબ ઓફ ભાવનગર રોયલે સામાજિક સેવાભાવનાનું સારું ઉદાહરણ પૂરું પાડ્યું. તેમણે ભાવનગર ટર્મિનસ સ્ટેશન પરના યાત્રી સહાયકોને રાશન કિટ, સાડી અને મીઠાઈ ભેટ આપીને સન્માનિત કર્યા. આ પ્રસંગે મંડળ રેલ પ્રબંધક દિનેશ વર્માએ રોટરી ક્લબ ઓફ ભાવનગર રોયલની આ પહેલના વખાણ કર્યા હતા. તેમણે કહ્યું કે આવી પહેલો સમાજના અલગ અલગ વર્ગો વચ્ચે સહયોગ, સન્માન અને માનવીય સંવેદનાઓને વધુ મજબૂત બનાવવામાં મહત્વનો ભાગ ભજવે છે. તેમણે રોટરી ક્લબના પદાધિકારીઓ અને સભ્યોના સામાજિક કામોના વખાણ કર્યા. કાર્યક્રમ દરમિયાન યાત્રી સહાયકો પ્રત્યે સન્માન અને આત્મીયતા જોવા મળી હતી. આ પહેલથી પર્વના અવસર પર તેમને ખાસ આનંદ અને પ્રોત્સાહન મળ્યું. સમારોહમાં રોટરી ક્લબ ઓફ ભાવનગર રોયલના અધ્યક્ષ વૈભવ વ્યાસ, સચિવ ભાવેશ છો થાની, પ્રોજેક્ટ ચેર ચંદ્રસિંહ ગોહિલ, યુથ ચેર ગૌરવ રાઠોડ અને સભ્ય જય જંખાનિયા હાજર રહ્યા હતા. આ ઉપરાંત, ભાવનગર રેલવે મંડળના મંડળ વાણિજ્ય નિરીક્ષક તુષાર બિપિન કુમાર શેખ સહિત અન્ય રેલ કર્મચારીઓ પણ ઉપસ્થિત રહ્યા હતા. પશ્ચિમ રેલવેનું ભાવનગર મંડળ મુસાફરોની સેવા સાથે સામાજિક ભાગીદારી અને માનવીય મૂલ્યોને પ્રોત્સાહન આપતી આવી સારી પહેલોને હંમેશા ટેકો આપે છે.