વડોદરા શહેરના ગોત્રી વિસ્તારમાં જન્માષ્ટમી પર્વ નિમિત્તે ભવ્ય અને રોમાંચક મટકી ફોડ કાર્યક્રમનું આયોજન કરવામાં આવ્યું હતું. કૃષ્ણ જન્મોત્સવના ઉલ્લાસ વચ્ચે યોજાયેલા આ કાર્યક્રમમાં ગોવિંદા મંડળીઓની સાહસિક રમત નિહાળવા માટે સમગ્ર વડોદરા શહેરમાંથી મોટી સંખ્યામાં માનવમેહરામણ ઉમટી પડ્યો હતો.

મુંબઈથી આવેલા ગોવિંદાઓએ 40 ફૂટ ઊંચી મટકી ફોડી

આ વર્ષના મટકી ફોડ કાર્યક્રમમાં મુખ્ય આકર્ષણનું કેન્દ્ર મુંબઈથી ખાસ આમંત્રિત કરવામાં આવેલી ગોવિંદા ટીમ રહી હતી. મુંબઈના ગોવિંદાઓએ ભારે ઉત્સાહ અને જોશ સાથે એકથી એક ચડિયાતા માનવ પિરામિડ રચીને 40 ફૂટની ભવ્ય ઊંચાઈ પર બાંધવામાં આવેલી મટકી સફળતાપૂર્વક ફોડી હતી. મટકી ફૂટતાં જ સમગ્ર ગોત્રી વિસ્તાર ‘જય કન્હૈયા લાલ કી’ અને ‘ગોવિંદા આલા રે’ના નારાઓથી ગુંજી ઊઠ્યો હતો.

તલવાર રાસ અને મલખમના સાહસિક કરતબે લોકોના દિલ જીત્યા

મટકી ફોડ સ્પર્ધાની સાથે-સાથે આયોજકો દ્વારા વિવિધ સાંસ્કૃતિક અને સાહસિક ખેલનું પણ વિશિષ્ટ આયોજન કરવામાં આવ્યું હતું. જેમાં કલાકારો દ્વારા તલવાર રાસની રમઝટ બોલાવવામાં આવી હતી તથા મલખમના અદભુત અને જોખમી કરતબ રજૂ કરવામાં આવ્યા હતા. આ મનમોહક અને સાહસિક પ્રદર્શને ઉપસ્થિત તમામ સહેલાણીઓ તથા નાગરિકોને મંત્રમુગ્ધ કરી દીધા હતા.

ગુજરાતના વધુ સમાચાર વાંચવા માટે ક્લિક કરો