સુરતમાં સચિન પોલીસ દ્વારા બ્રાઉન સુગરના જથ્થા સાથે ઝડપી પાડવામાં આવેલા ઓડિશાના ત્રણ આરોપીઓની તપાસમાં ચોંકાવનારા ખુલાસા થયા છે. સચિન વિસ્તારમાં રહેતા આરોપી કરણ નામના ઈસમને નાણાંની જરૂરિયાત ઊભી થતાં તેણે પોતાના વતન ઓડિશામાં રહેતા મિત્રો જીબાન અને ચંદ્રશેખરનો સંપર્ક કર્યો હતો. પૈસાની તંગી દૂર કરવા માટે મિત્રોએ તેને બ્રાઉન સુગર વેચીને ઝડપી કમાણી કરવાનો ગેરકાયદેસર રસ્તો બતાવ્યો હતો.
મિત્રોના કહેવાથી ઓડિશાથી સુરત મંગાવાયો ડ્રગ્સનો જથ્થો
મિત્રોની વાતોમાં આવી જઈને કરણે ઓડિશાથી પોતાના બંને મિત્રોને બ્રાઉન સુગરનો જથ્થો લઈને સુરત બોલાવ્યા હતા. જોકે, આ ગેરકાયદેસર હેરાફેરી અંગે સચિન પોલીસને ચોક્કસ બાતમી મળી ગઈ હતી. બાતમીના આધારે પોલીસે સચિન રેલવે સ્ટેશન નજીક વોચ ગોઠવીને વોચ દરમિયાન ત્રણેય આરોપીઓને બ્રાઉન સુગરના જથ્થા સાથે રંગેહાથ ઝડપી પાડ્યા હતા.
ચિન્મય શેટ્ટી નામના શખ્સે મોકલ્યું હતું ડ્રગ્સ
પોલીસની પ્રાથમિક પૂછપરછ દરમિયાન સામે આવ્યું છે કે આ બ્રાઉન સુગરનો જથ્થો ઓડિશાના ચિન્મય શેટ્ટી નામના યુવકે મોકલ્યો હતો. સચિન પોલીસે ત્રણેય આરોપીઓને અદાલતમાં રજૂ કરીને કસ્ટડી માંગતા કોર્ટે આરોપીઓના બે દિવસના પોલીસ રિમાન્ડ મંજૂર કર્યા છે. હાલ પોલીસે મુખ્ય સપ્લાયર ચિન્મય શેટ્ટીને પકડી પાડવા અને સુરતમાં ડ્રગ્સ નેટવર્કના મૂળ સુધી પહોંચવા માટે વધુ તપાસ હાથ ધરી છે.