રાજકોટના રેસકોર્સ મેદાનમાં આજે 6 સપ્ટેમ્બરના રોજ જન્માષ્ટમી લોકમેળાના છેલ્લા દિવસે જનમેદની ઊમટી પડી હતી. 5 દિવસ દરમિયાન 13 લાખથી વધુ મુલાકાતીઓ આ લોકમેળાની મજા માણી ચૂક્યા છે. બાળકો, મહિલાઓ અને યુવાનોએ પરિવાર સાથે ચકડોળ તેમજ વિવિધ યાંત્રિક રાઇડ્સમાં બેસીને આનંદ માણ્યો હતો. રાંધણ છઠ્ઠના પ્રથમ દિવસે મોટી રાઇડ્સ શરૂ ન થઈ શકી હોવાથી મુલાકાતીઓએ મેળો વધુ 1 દિવસ લંબાવવાની માંગ કરી હતી, પરંતુ વહીવટી તંત્ર દ્વારા નિયત સમયે જ મેળાની પૂર્ણાહુતિ કરવામાં આવી હતી. સૌરાષ્ટ્રના સૌથી મોટા લોકમેળાનું સુવ્યવસ્થિત આયોજન
રાજકોટ લોકમેળા અમલીકરણ સમિતિના અધ્યક્ષ અજય ઝાંપડાના જણાવ્યા મુજબ, ‘વિરાસતથી વિકાસ’ લોકમેળો એ સમગ્ર સૌરાષ્ટ્રનો સૌથી મોટો મેળો છે. રાજ્ય સરકારની સીધી દેખરેખ હેઠળ જિલ્લા વહીવટી તંત્ર અને લોકમેળા સમિતિ દ્વારા છેલ્લા 3 મહિનાથી આ ભવ્ય આયોજન માટે તડામાર તૈયારીઓ ચાલી રહી હતી, જેને પરિણામે લાખો લોકો સુરક્ષિત રીતે મેળાનો આનંદ માણી શક્યા. સુરક્ષા વ્યવસ્થા અને ઇમરજન્સી કોરિડોરની ઉત્તમ કામગીરી
લોકોની સુરક્ષાને સર્વોચ્ચ પ્રાથમિકતા આપતાં મેળા ગ્રાઉન્ડમાં 2 નવા ઈમરજન્સી એક્ઝિટ રૂટ અને 1 વિશેષ ઈમરજન્સી કોરિડોર ઊભો કરવામાં આવ્યો હતો. આ વિશેષ વ્યવસ્થાના લીધે કટોકટીના સમયે એમ્બ્યુલન્સ કોઈપણ અડચણ વિના ઝડપથી બહાર નીકળી દર્દીઓને હોસ્પિટલ પહોંચાડી શકી હતી. અંતિમ દિવસની રાત્રે 8 વાગ્યા સુધીમાં લાખો પરિવારોએ આ આયોજન હેઠળ નિર્ભયતાથી મેળાની મોજ માણી હતી. ચુસ્ત ચકાસણી, સાંસ્કૃતિક કાર્યક્રમો અને મુલાકાતીઓનો ઉત્સાહ
કોઈ અનિચ્છનીય બનાવ ન બને તે માટે તંત્ર દ્વારા દૈનિક ધોરણે તમામ રાઈડ્સનું ફિટનેસ ચેકિંગ કરવામાં આવ્યું હતું. રાજ્ય સરકારના રમતગમત અને સાંસ્કૃતિક વિભાગના સહયોગથી જાણીતા કલાકારોના સાંસ્કૃતિક કાર્યક્રમો પણ યોજાયા હતા. આ ઉપરાંત નિયત દર કરતાં વધુ ભાડું વસૂલતા સ્ટોલ અને રાઇડ ધારકો સામે તોલમાપ વિભાગે તાત્કાલિક પગલાં લીધાં હતાં. પ્રથમ દિવસે રાઇડ્સ મોડી ચાલુ થઈ હોવાથી મેળો લંબાવવાની લોકોની લાગણી વચ્ચે નાગરિકોએ મન મૂકીને ઉત્સવનો આનંદ લીધો હતો.