અમરેલી જિલ્લામાં સતત બીજા દિવસે વાતાવરણમાં અચાનક પલટો જોવા મળ્યો છે. ખાસ કરીને ખાંભા ગીર પંથકના ગ્રામ્ય વિસ્તારોમાં અચાનક વાદળછાયું વાતાવરણ સર્જાયા બાદ વરસાદી ઝાપટાં શરૂ થઈ ગયાં હતાં. ખાંભા તાલુકાના ભાડ ગામે અચાનક પડેલા વરસાદી ઝાપટાંને કારણે સમગ્ર પંથકના વાતાવરણમાં ઠંડક પ્રસરી ગઈ હતી અને ગ્રામજનો સહિત ધરતીપુત્રોમાં હરખની હેલી જોવા મળી હતી.

મુરઝાતા કપાસ અને મગફળીના પાકને મળ્યું જીવનદાન

છેલ્લા કેટલાક સમયથી વરસાદ ખેંચાવાના કારણે કપાસ અને મગફળી સહિતનો ઊભો પાક સુકાઈ રહ્યો હતો. પાક મુરઝાઈ રહ્યો હોવાથી ખેડૂતો ભારે ચિંતામાં મુકાયા હતા. આ મુશ્કેલ પરિસ્થિતિ વચ્ચે ભાડ ગામે પડેલા વરસાદી ઝાપટાંએ સુકાઈ રહેલા પાક માટે સંજીવની સમું કામ કર્યું છે. કપાસ અને મગફળીના પાકને નવું જીવનદાન મળતાં ખેડૂતોની મહેનત અને આર્થિક નુકસાન બચી જવાની મોટી આશા જાગી છે.

ખેડૂતોમાં મોટા વરસાદની આશા બંધાઈ

વરસાદી ઝાપટાં પડતાં જ ધરતીપુત્રોના ચહેરા પર ખુશીનો માહોલ છવાઈ ગયો છે. વાતાવરણમાં આવેલા આ સાનુકૂળ પલટાને કારણે હવે આગામી દિવસોમાં વધુ સારો વરસાદ પડશે તેવી આશાઓ બંધાઈ છે. સતત બીજા દિવસે બદલાયેલા હવામાનથી ગીર પંથકના અન્ય વિસ્તારોમાં પણ વહેલી તકે સાર્વત્રિક વરસાદ પડે તેવી આશા સાથે ખેડૂતો મેઘરાજાની પધરામણીની વાટ જોઈ રહ્યા છે.

આ પણ વાંચો : Weather Update : મેઘરાજા ફરી ધમાકેદાર ઈનિંગ્સ રમવા તૈયાર! 12 થી 15 સપ્ટેમ્બર ગાજવીજ સાથે ધોધમાર વરસાદની આગાહી