સુરેન્દ્રનગર જિલ્લાના ખમીસાણા ગામમાં ખેડૂતોને પરંપરાગત ખેતીમાંથી બાગાયતી અને આધુનિક ખેતી તરફ પ્રોત્સાહિત કરવા એક કાર્યક્રમ યોજાયો. આ કાર્યક્રમ દાડમ પાક નિદર્શન અને ચર્ચા સત્રના રૂપમાં હતો. વનિતા એગ્રોકેમ પ્રાઈવેટ લિમિટેડ અને વિટ્રીગોલ્ડ બાયોટેક પ્રાઈવેટ લિમિટેડના સહયોગથી આયોજિત આ કાર્યક્રમમાં સુરેન્દ્રનગર જિલ્લાના 1200થી વધુ ખેડૂતો હાજર રહ્યા. તેમને મહારાષ્ટ્ર જેવી ગુણવત્તાયુક્ત અને વધુ ઉત્પાદન આપતી દાડમની ખેતી કેવી રીતે કરવી તેની પ્રેક્ટિકલ માહિતી આપવામાં આવી. કાર્યક્રમમાં નિષ્ણાતોએ દાડમના પાકમાં થતા રોગો અને જીવાતોને કેવી રીતે કાબૂમાં લેવા તે સમજાવ્યું. તેમણે પાકની જાળવણી, જમીનની ફળદ્રુપતા, પાણીનું વ્યવસ્થાપન, ખાતરનો યોગ્ય ઉપયોગ અને પોષણ વ્યવસ્થાપન જેવા મુદ્દાઓ પર ખેડૂતોને વિગતવાર માહિતી આપી. ચર્ચા સત્રમાં ખેડૂતોને દાડમના છોડની સંભાળ રાખવા, પાકની ગુણવત્તા જાળવવા અને સ્થાનિક હવામાન પ્રમાણે પાકનું વ્યવસ્થાપન કરવા વિશે શીખવવામાં આવ્યું. તેમને માત્ર થિયરી જ નહીં, પણ પાકના લાઈવ નિદર્શન દ્વારા ખેતીની પદ્ધતિઓ પણ બતાવવામાં આવી. આનાથી હાજર ખેડૂતોમાં ઘણો રસ જોવા મળ્યો. આ કાર્યક્રમમાં કૃષ્ણા કુલકર્ણી (સાયન્ટિસ્ટ), ઘનશ્યામભાઈ પટેલ (જનરલ મેનેજર, વિટ્રીગોલ્ડ બાયોટેક), વિશ્વાસ બારવે (એગ્રોનોમિસ્ટ), વૈભવ પંઢરે (RSM-ગુજરાત) અને રૂચાબેન જેવા કૃષિ નિષ્ણાતો હાજર હતા. તેમણે દાડમના પાકમાં રોગ અને જીવાતને કાબૂમાં લેવા, ગુણવત્તા સુધારવા અને ઉત્પાદન વધારવા માટેની ટેકનિકલ બાબતો સમજાવી. આયોજકોએ આમંત્રિત મહેમાનોનું સન્માન કર્યું. હિતેન્દ્રસિંહ ઝાલા અને દિગ્વિજયસિંહ ઝાલા સહિતના આગેવાનો પણ હાજર હતા. આ કાર્યક્રમનો મુખ્ય હેતુ ખેડૂતોને પરંપરાગત ખેતી છોડીને બાગાયતી ખેતીના નવા વિકલ્પો અપનાવવા પ્રોત્સાહિત કરવાનો હતો. નિષ્ણાતોએ જણાવ્યું કે, યોગ્ય ટેકનિક અપનાવીને દાડમ જેવા બાગાયતી પાકોમાં વધુ ઉત્પાદન અને સારી ગુણવત્તા મેળવી શકાય છે. આનાથી ખેડૂતોની આવક વધશે. વનિતા એગ્રો અને બાયોટેક દ્વારા લગભગ 1200 ખેડૂતોને ફાર્મની મુલાકાત કરાવી પાક નિદર્શન સાથે માર્ગદર્શન આપવામાં આવ્યું. દાડમની ખેતીમાં નવા આવવા માંગતા અને પહેલાથી ખેતી કરતા ખેડૂતો માટે આ કાર્યક્રમ ખૂબ જ ઉપયોગી સાબિત થયો. ખેડૂતો તરફથી સારો પ્રતિસાદ મળ્યો. આયોજકો અને કાર્યકરોએ આ કાર્યક્રમને સફળ બનાવવા ઘણી મહેનત કરી હતી.