3 સપ્ટેમ્બરથી ભારત અને અફઘાનિસ્તાન વચ્ચે ત્રણ મેચોની T20 શ્રેણીનો પ્રારંભ થઈ રહ્યો છે. આ શ્રેણીમાં એક અનોખો અને દુર્લભ નજારો જોવા મળશે. દિલ્હીના અરૂણ જેટલી સ્ટેડિયમ ખાતે રમાનારી ત્રણેય મેચો માટે ભારતીય ટીમને વિઝિટર્સ ડ્રેસિંગ રૂમ ફાળવવામાં આવ્યો છે. એટલે કે ટીમ ઈન્ડિયા પોતાના જ દેશમાં રમાઈ રહેલી શ્રેણી દરમિયાન હોમ ટીમ માટેના ડ્રેસિંગ રૂમનો ઉપયોગ કરી શકશે નહીં.

પોતાના ઘરમાં જ ભારતીય ટીમ મહેમાન

આ અનોખા ફેરફારનું મુખ્ય કારણ સ્ટેડિયમ કે મેદાન નથી, પરંતુ આ શ્રેણીના સત્તાવાર આયોજક (હાલના મેજબાન) છે. અફઘાનિસ્તાન ક્રિકેટ બોર્ડ (ACB) આ દ્વિપક્ષીય શ્રેણીનું હોસ્ટિંગ કરી રહ્યું છે. પરિણામે, વહીવટી અને ટેકનિકલ દ્રષ્ટિએ અફઘાનિસ્તાન હોમ ટીમ છે, અને ભારતને મહેમાન ટીમ ગણવામાં આવી છે. આ નિયમના આધારે જ બંને ટીમો માટે ડ્રેસિંગ રૂમની ફાળવણી કરવામાં આવી છે.

ક્રિકેટના ઈતિહાસમાં પહેલીવાર બનશે આવું

અરૂણ જેટલી સ્ટેડિયમનો હોમ ડ્રેસિંગ રૂમ પૂર્વ ભારતીય ક્રિકેટર રમણ લાંબાના નામે છે, જેમાં આ શ્રેણી દરમિયાન અફઘાનિસ્તાનની ટીમ ઉતરશે. બીજી તરફ, ભારતીય ટીમને પ્રકાશ ભંડારીના નામે બનેલા વિઝિટર્સ ડ્રેસિંગ રૂમમાં પોતાનું સ્થાન મળશે. ત્રણેય મેચો દરમિયાન આ જ વ્યવસ્થા યથાવત રહેશે. ભારતીય ક્રિકેટના ઈતિહાસમાં આ પહેલો એવો પ્રસંગ હશે જ્યારે સ્વદેશમાં રમી રહેલી ભારતીય ટીમ મહેમાન ટીમના ડ્રેસિંગ રૂમનો ઉપયોગ કરશે.

અફઘાનિસ્તાન બોર્ડને સત્તાવાર મેજબાનનો દરજ્જો 

હાલમાં અફઘાનિસ્તાનમાં આંતરરાષ્ટ્રીય ક્રિકેટ માટે જરૂરી સુવિધાઓ અને સુરક્ષા સંબંધિત પડકારોને કારણે અફઘાનિસ્તાન ક્રિકેટ બોર્ડ અવારનવાર પોતાની હોમ સિરીઝ બીજા દેશોમાં યોજે છે. આ અગાઉ પણ અફઘાનિસ્તાને ભારતના નોઈડા, દેહરાદૂન અને લખનૌ જેવા મેદાનોને પોતાના હોમ ગ્રાઉન્ડ તરીકે વાપરીને આંતરરાષ્ટ્રીય મેચો રમી છે. પરંતુ ભારત સામે ભારતીય ભૂમિ પર રમાઈ રહેલી દ્વિપક્ષીય શ્રેણીમાં અફઘાનિસ્તાન બોર્ડને સત્તાવાર મેજબાનનો દરજ્જો મળ્યો હોય તેવું પ્રથમ વખત બન્યું છે.

ભારતીય ટીમ માટે પરિસ્થિતિઓ બદલાશે નહીં

સામાન્ય રીતે જે દેશમાં મેચ રમાતી હોય તે જ દેશની ટીમને હોમ ડ્રેસિંગ રૂમ આપવામાં આવતો હોય છે. પરંતુ આ શ્રેણીની વહીવટી સત્તા અફઘાનિસ્તાન પાસે હોવાને કારણે આ પરિસ્થિતિ સર્જાઈ છે. જોકે, આનાથી ભારતીય ટીમ માટે મેદાન પરની ઘર આંગણાની પરિસ્થિતિઓ બદલાશે નહીં, પરંતુ સ્ટેડિયમ પરિસરમાં આ વિશિષ્ટ ફેરફાર સ્પષ્ટપણે જોવા મળશે.