આગામી સમયમાં ભારત અને અફઘાનિસ્તાન વચ્ચે 13 સપ્ટેમ્બરથી શરૂ થનારી ત્રણ મેચની T20 શ્રેણીને લઈને ક્રિકેટ રસિકોમાં ભારે ઉત્સાહ જોવા મળી રહ્યો છે. આ શ્રેણીની તમામ મેચ દિલ્હીના અરુણ જેટલી સ્ટેડિયમમાં રમાવાની છે, જેમાં યજમાનની ભૂમિકા અફઘાનિસ્તાન ભજવી રહ્યું છે. T20 વર્લ્ડ કપ 2026 જીત્યા બાદ ફેરફારો સાથે મેદાનમાં ઉતરેલી ભારતીય ટીમની કમાન શ્રેયસ અય્યર સંભાળી રહ્યો છે, અને તેમના નેતૃત્વમાં દેશમાં રમાનાર આ પ્રથમ T20 શ્રેણી છે. અગાઉ શ્રેયસની આગેવાનીમાં રમાયેલી ત્રણ T20 શ્રેણીમાંથી ટીમ માત્ર એક જ જીતી મેચ શકી છે, જેથી તેના માટે આ સિરીઝ ઘણી મહત્વપૂર્ણ સાબિત થશે. વળી, અફઘાનિસ્તાન સામેના T20 આંતરરાષ્ટ્રીય રેકોર્ડની વાત કરીએ તો, ભારતનો દબદબો રહ્યો છે અને અત્યાર સુધી એકપણ મેચમાં હારનો સામનો કરવો પડ્યો નથી.

અફઘાનિસ્તાન સામે ભારતનું પલડું ભારે 

બંને દેશો વચ્ચે અત્યાર સુધી કુલ 9 T20 મુકાબલા થયા છે, જેમાંથી ભારતે 8 મેચમાં વિજય મેળવ્યો છે, જ્યારે એક મુકાબલો અનિર્ણીત રહ્યો છે. કેપ્ટન તરીકે શ્રેયસ અય્યર સામે આ અજેય રેકોર્ડને જાળવી રાખવાની સૌથી મોટી જવાબદારી રહેશે. બીજી તરફ, છેલ્લા કેટલાક વર્ષોમાં અફઘાનિસ્તાનની ટીમે T20 ક્રિકેટમાં શાનદાર પ્રદર્શન કરતા મોટી ટીમોને પણ હરાવી છે, જેના કારણે ટીમ ઈન્ડિયા માટે આ શ્રેણી સરળ નહીં રહે.

ઘરઆંગણે ભારતીય ટીમ અજેય

ભારતે અફઘાનિસ્તાન સામે ઘરઆંગણે અત્યાર સુધી ત્રણ T20 મેચ રમી છે અને ત્રણેયમાં જીત મેળવી છે. આ બંને વચ્ચે છેલ્લી ઘરેલુ T20 મેચ વર્ષ 2024ની શરૂઆતમાં બેંગલુરુના એમ. ચિન્નાસ્વામી સ્ટેડિયમમાં રમાઈ હતી, જે નિયત સમયમાં ટાઈ થયા બાદ બે સુપર ઓવરના રોમાંચક અંતે ભારતે જીતી લીધી હતી.