12 સપ્ટેમ્બરના રોજ વર્લ્ડ ફર્સ્ટ એઈડ ડે નિમિત્તે જામનગરમાં એક વિશેષ ફર્સ્ટ એઈડ અવેરનેસ સેમિનાર અને CPR ટ્રેનિંગનું આયોજન કરાયું હતું. રોટરી ક્લબ ઇમેજિકા જામનગર અને બરોડા હાર્ટ એન્ડ શારદા સુપર સ્પેશિયાલિટી હોસ્પિટલે આ કાર્યક્રમ સંયુક્તપણે યોજ્યો હતો. તેનો હેતુ અકસ્માત કે મેડિકલ ઇમરજન્સીમાં દર્દી હોસ્પિટલ પહોંચે તે પહેલાં જીવન બચાવવાના પ્રથમ પગલાં વિશે જાગૃતિ લાવવાનો હતો. આ સેમિનારમાં જાણીતા ડોકટરો ડૉ. મિલન રાબડીયા (ઇમરજન્સી મેડિસિન) અને ડૉ. મોહિત પાબારી (ઓર્થોપેડિક સર્જન) હાજર રહ્યા હતા. તેમણે અકસ્માત અને મેડિકલ ઇમરજન્સીમાં શું કરવું અને શું ન કરવું તે સમજાવ્યું. ફર્સ્ટ એઈડનું મહત્વ, CPR ક્યારે અને કેવી રીતે આપવું, તેમજ દર્દીને હોસ્પિટલ પહોંચાડતા પહેલાની મહત્વની ક્ષણોમાં યોગ્ય રીતે મદદ કેવી રીતે કરવી તે અંગે માર્ગદર્શન આપ્યું. કાર્યક્રમમાં ‘ગોલ્ડન અવર’નું મહત્વ પણ સમજાવવામાં આવ્યું. ઇમરજન્સીમાં સમયસર મળેલી મદદ અને એક યોગ્ય ફર્સ્ટ રિસ્પોન્ડર દર્દીનું જીવન બચાવવામાં ખૂબ મહત્વના બની શકે છે. આ કાર્યક્રમ માત્ર CPR ટ્રેનિંગ પૂરતો સીમિત ન રહેતા, દરેક પરિવાર, ઓફિસ, સંસ્થા અને સમાજ સુધી ફર્સ્ટ એઈડ અને ઇમરજન્સી રિસ્પોન્સની જાગૃતિ પહોંચાડવાનો પ્રયાસ હતો. વર્લ્ડ ફર્સ્ટ એઈડ ડે નિમિત્તે બરોડા હાર્ટ એન્ડ શારદા સુપર સ્પેશિયાલિટી હોસ્પિટલ, જામનગર દ્વારા એક સંકલ્પ લેવાયો. તેમણે કહ્યું કે વધુમાં વધુ લોકો સુધી CPR, ફર્સ્ટ એઈડ અને ઇમરજન્સી રિસ્પોન્સની મહત્વની માહિતી પહોંચાડવી જોઈએ. સમયસર ફર્સ્ટ રિસ્પોન્સ અને પછી યોગ્ય ક્રિટિકલ કેર મળે તો ઘણા કિસ્સાઓમાં જીવન બચાવી શકાય છે. આ કાર્યક્રમના આયોજનમાં સહયોગ આપવા બદલ બરોડા હાર્ટ એન્ડ શારદા સુપર સ્પેશિયાલિટી હોસ્પિટલના યુનિટ હેડ ડૉ. સંજય પન્ના, રોટરી ક્લબ ઇમેજિકા જામનગરના પ્રેસિડેન્ટ રોટેરીયન હરદીપસિંહ જાડેજા અને પ્રોજેક્ટ ચેર રોટેરીયન હર્ષ પરમારનો આભાર મનાયો. આ કાર્યક્રમ લોર્ડ્સ સ્ટુડિયો ઇન હોટેલ, જામનગર ખાતે સાંજે 4 વાગ્યાથી યોજાયો હતો. રોટરી ક્લબ ઇમેજિકા જામનગરના સભ્યો, હોસ્પિટલની ટીમ અને મીડિયાના મિત્રોએ સાથે મળીને આ પહેલ કરી. જામનગરમાં ફર્સ્ટ એઈડ અને CPR અંગે જનજાગૃતિ ફેલાવવામાં આ એક મહત્વનું પગલું સાબિત થયું. આ કાર્યક્રમમાં રોટરી ક્લબ ઇમેજિકા જામનગરના આશરે 40થી 50 સભ્યો અને તેમના પરિવારજનોએ ભાગ લીધો હતો.