ઈંગ્લેન્ડ ક્રિકેટ ટીમના ટેસ્ટ કેપ્ટન અને અનુભવી બેટ્સમેન જો રૂટે ક્રિકેટના ભગવાન કહેવાતા સચિન તેંડુલકરનો 13 વર્ષ જુનો રેકોર્ડ તોડી નાખ્યો છે. રૂટ હવે ટેસ્ટ ક્રિકેટના ઇતિહાસમાં સૌથી વધુ અડધી સદી ફટકારનાર બેટ્સમેન બની ગયો છે. પાકિસ્તાન સામે એજબેસ્ટનમાં રમાયેલી ત્રીજી ટેસ્ટ મેચની ચોથી ઇનિંગ્સમાં રૂટે 9 ચોગ્ગાની મદદથી અણનમ 62 રનની શાનદાર ઇનિંગ રમી હતી, જેના દ્વારા તેણે મહાન બેટ્સમેન સચિન તેંડુલકરને પાછળ છોડી દીધા છે.

સચિનના રેકોર્ડને તોડ્યો 

રૂટની આ રેકોર્ડબ્રેક ઇનિંગે માત્ર ટીમને વિજય અપાવવામાં જ મદદ કરી ન હતી, પરંતુ તેણે ટેસ્ટ ક્રિકેટમાં એક નવો વર્લ્ડ રેકોર્ડ પણ સ્થાપિત કરી દીધો છે. સચિન તેંડુલકરે પોતાની ટેસ્ટ કારકિર્દીમાં કુલ 68 અડધી સદી ફટકારી હતી, જ્યારે જો રૂટે હવે પોતાની 69મી ટેસ્ટ અડધી સદી ફટકારીને આ યાદીમાં ટોચનું સ્થાન મેળવી લીધું છે. આ રેકોર્ડ લિસ્ટમાં વેસ્ટ ઈન્ડિઝના દિગ્ગજ શિવનારાયણ ચંદ્રપોલ 66 અડધી સદી સાથે ત્રીજા સ્થાન પર સરકી ગયો છે.

ટેસ્ટ ક્રિકેટમાં સૌથી વધુ અડધી સદી ફટકારનાર બેટ્સમેન

જો રૂટ (ઇંગ્લેન્ડ) – 69

સચિન તેંડુલકર (ભારત) – 68

શિવનારાયણ ચંદ્રપોલ (વેસ્ટ ઈન્ડિઝ) – 66

એલન બોર્ડર (ઓસ્ટ્રેલિયા) – 63

રાહુલ દ્રવિડ (ભારત) – 63

હવે બીજા રેકોર્ડને તોડવા પર રૂટની નજર 

ટેસ્ટ ક્રિકેટના ઇતિહાસમાં સૌથી વધુ રન બનાવવાનો રેકોર્ડ ભારતના દિગ્ગજ બેટ્સમેન સચિન તેંડુલકરના નામે છે. તેમણે પોતાની શાનદાર કારકિર્દી દરમિયાન 200 મેચની 329 ઇનિંગ્સમાં બેટિંગ કરીને કુલ 15,921 રન બનાવ્યા હતા. આ ઓલ-ટાઇમ લિસ્ટમાં ઇંગ્લેન્ડના સ્ટાર બેટ્સમેન જો રૂટ હાલમાં બીજા ક્રમે છે. તેમણે અત્યાર સુધીમાં 169 ટેસ્ટ મેચની 309 ઇનિંગ્સમાં 50.45 ની શાનદાર સરેરાશ સાથે 14,278 રન પોતાના નામે કરી લીધા છે. આ આંકડાઓ જોતાં સ્પષ્ટ થાય છે કે રૂટ હવે સચિનના આ રેકોર્ડથી માત્ર 1,643 રન જ દૂર છે. આગામી સમયમાં એ જોવું રસપ્રદ રહેશે કે, શું ઇંગ્લેન્ડનો આ અનુભવી બેટ્સમેન સચિન તેંડુલકરના આ મહાન રેકોર્ડને તોડીને નવો ઇતિહાસ રચી શકે છે કે નહીં?

ટેસ્ટ ક્રિકેટમાં સૌથી વધુ રન બનાવનારા ખેલાડીઓ

સચિન તેંડુલકર – 15,921 રન

જો રૂટ (સક્રિય ખેલાડી) – 14,278 રન

રિકી પોન્ટિંગ – 13,378 રન

જેક કાલિસ – 13,289 રન

રાહુલ દ્રવિડ – 13,288 રન

વર્ષ 2012માં જો રૂટે કર્યું હતું ટેસ્ટ ડેબ્યૂ  

જો રૂટે વર્ષ 2012 માં ટેસ્ટ ક્રિકેટમાં પદાર્પણ કર્યું હતું, જ્યારે ભારતના મહાન બેટ્સમેન સચિન તેંડુલકરે વર્ષ 2013 માં પોતાની કારકિર્દીની છેલ્લી ટેસ્ટ મેચ રમી હતી. રૂટ અત્યાર સુધીમાં આ ફોર્મેટમાં 169 મેચ રમી ચૂક્યો છે, જેમાં 309 ઇનિંગ્સ દરમિયાન તેના બેટથી કુલ 14,278 રન નીકળ્યા છે. આ લાંબી સફરમાં તેણે શાનદાર પ્રદર્શન કરતા 69 અડધી સદી ઉપરાંત 41 સદી પણ ફટકારી છે. ઉલ્લેખનીય છે કે, સચિન તેંડુલકરે પોતાના ટેસ્ટ કરિયરમાં કુલ 51 સદી ફટકારીને ક્રિકેટને અલવિદા કહી દીધું હતું.