હવામાન વિભાગ દ્વારા કરવામાં આવેલી વરસાદની આગાહી વચ્ચે મધ્ય ગુજરાતના ખેડા અને વડોદરા જિલ્લાના વાતાવરણમાં બપોર પછી અચાનક મોટો પલટો આવ્યો છે. ખેડા જિલ્લાના કપડવંજ શહેર અને તેની આસપાસના ગ્રામ્ય વિસ્તારોમાં બપોરે 3 વાગ્યા બાદ વાદળો ઘેરાયા હતા અને વરસાદની શરુઆત થઈ હતી. આ જ પ્રમાણે વડોદરા જિલ્લાના ડેસર તાલુકામાં પણ બપોર પછી જોરદાર પવન સાથે વરસાદી ઝાપટાં શરૂ થતાં સમગ્ર પંથકમાં મેઘમહેર જોવા મળી હતી.

અસહ્ય બફાતથી મુક્તિ અને રસ્તાઓ પર વહ્યા પાણી

છેલ્લા કેટલાક દિવસોથી બંને જિલ્લાઓમાં અસહ્ય ગરમી, બફારા અને ઉકળાટના કારણે સ્થાનિક રહીશો ભારે અકળામણ અનુભવી રહ્યા હતા. જોકે, બપોર બાદ પવનના સુસવાટા સાથે પડેલા મેઘરાજાના આ ઝાપટાંને કારણે સમગ્ર વાતાવરણમાં આહલાદક ઠંડક પ્રસરી ગઈ છે અને લોકોને ગરમીમાંથી મોટી રાહત મળી છે. વડોદરાના ડેસર તાલુકામાં પવન સાથે પડેલા વરસાદના કારણે માર્ગો પર પાણી વહી નીકળ્યા હતા, જેનાથી વાતાવરણ રમણીય બની ગયું હતું.

સુકાવાના આરે પહોંચેલી મોલાતને મળ્યું સંજીવની જીવનદાન

સૌથી વધુ રાહતના સમાચાર ખેડૂત આલમ માટે આવ્યા છે. વરસાદ ખેંચાવાને કારણે કપડવંજ અને ડેસર પંથકમાં વાવેતર કરેલા કપાસ, મગફળી, એરંડા, બાજરી, ડાંગર અને કઠોળ જેવા ચોમાસુ પાકો સુકાવાના આરે પહોંચી ગયા હતા. સિંચાઈના ખરા સમયે જ મેઘરાજાએ પધરામણી કરતાં પાકને જરૂરી ભેજ મળી રહેશે અને સુકાતી મોલાત બચી જશે. પાકને નવું જીવનદાન મળવાની પૂરેપૂરી આશા જાગતાં જ બંને પંથકના જગતના તાતમાં ભારે ખુશી અને હાસકારાની લહેર દોડી ગઈ છે.

આ પણ વાંચો : Ahmedabad News : રખિયાલમાં ડુપ્લીકેટ ખાધ્ય તેલનું કૌભાંડ ઝડપાયું, ‘તિરુપતિ’ ના અસલી ડબ્બામાં વેચાતું હતું નકલી તેલ!