ઓગસ્ટ 2026 માં જથ્થાબંધ ફુગાવો વધીને 9.92 % થયો છે, જે જુલાઈમાં 9.78 % હતો. આનો અર્થ એ થયો કે સતત ચોથા મહિને જથ્થાબંધ ફુગાવાનો દર 10 % ની આસપાસ રહ્યો છે. 14 સપ્ટેમ્બરના રોજ, વાણિજ્ય અને ઉદ્યોગ મંત્રાલયે ઓગસ્ટ 2026 માટે જથ્થાબંધ ભાવ સૂચકાંક (WPI) ડેટા જાહેર કર્યો હતો.

WPI શું છે અને ૯.૯૨% નો અર્થ શું છે?

WPI એટલે જથ્થાબંધ ભાવ સૂચકાંક, જે જથ્થાબંધ બજારમાં માલ વેચાતા ભાવની ગણતરી કરે છે. તેમાં સેવાઓ જેવી કે શાળાની ફી, ડૉક્ટરની ફી કે ભાડું સામેલ હોતું નથી. ઓગસ્ટમાં WPI ફુગાવો ૯.૯૨% હોવાનો અર્થ એ નથી કે બજારમાં દરેક વસ્તુ ૧૦% મોંઘી થઈ ગઈ છે, પરંતુ તેનો સીધો અર્થ એ છે કે ઓગસ્ટ ૨૦૨૬માં WPI માં સમાવિષ્ટ વસ્તુઓના ભાવ ઓગસ્ટ ૨૦૨૫ની સરખામણીમાં સરેરાશ ૯.૯૨% વધ્યા છે.

ફુગાવો આટલો બધો કેમ વધ્યો?

આ ફુગાવામાં વીજળી અને પેટ્રોલ સૌથી મોટી ભૂમિકા ભજવે છે. ઓગસ્ટમાં આ શ્રેણીમાં ફુગાવો ૨૨.૯૩% હતો, જ્યારે પેટ્રોલિયમ ઉત્પાદનોના ભાવ ગયા વર્ષની સરખામણીમાં ૩૮.૪૮% વધ્યા હતા. ક્રૂડ પેટ્રોલિયમ અને કુદરતી ગેસમાં ૩૪.૪૧% નો વધારો થયો છે. આ ઉપરાંત, ખાદ્ય અને પીણાનો ફુગાવો પણ જુલાઈના ૬.૬૫% થી વધીને ઓગસ્ટમાં ૭.૦૫% પર પહોંચ્યો છે.

તમારા ખિસ્સા પર શું અસર પડશે?

WPI તમારા ખિસ્સા પર સીધી અસર કરતું નથી, પરંતુ જથ્થાબંધ ભાવ વધવાથી કંપનીઓનો કાચા માલનો ખર્ચ વધે છે, જે સમય જતાં ઉત્પાદનોના છૂટક ભાવમાં વધારો કરે છે. જો કે, કેટલીક શ્રેણીઓમાં રાહત પણ મળી છે, જેમ કે પ્રાથમિક ચીજોનો ફુગાવો ૮.૫૨% થી ઘટીને ૭.૭૬% થયો છે. માર્ચ ૨૦૨૬માં ૩.૯૮% રહેલો ફુગાવો બેઝ ઇફેક્ટ અને અન્ય પરિબળોને કારણે વધીને લગભગ ૧૦% સુધી પહોંચ્યો છે.

આ પણ વાંચોઃ Ladakh : વર્ષો જૂના તળાવને બચાવવા અનોખી પહેલ, ગંદા ગ્લેશિયરના પાણીનો થશે આ રીતે ઉપયોગ