અમરેલી જિલ્લાના બાબરા પંથકમાં મેઘરાજા સતત બીજા દિવસે પણ મહેરબાન રહ્યા છે. અસહ્ય ઉકળાટ બાદ બપોર પછી વાતાવરણમાં પલ્ટો આવ્યો હતો અને કાળાડિબાંગ વાદળોની ગર્જના સાથે ધોધમાર વરસાદ વરસી પડ્યો હતો. બાબરા શહેરમાં ટૂંક જ સમયમાં સારો એવો વરસાદ ખાબકતાં મુખ્ય બજારો અને રસ્તાઓ પર નદીઓની જેમ વરસાદી પાણી વહેતાં થયાં હતા.

ગ્રામ્ય પંથકમાં પણ સાર્વત્રિક મેઘમહેર

માત્ર શહેર જ નહીં, પરંતુ બાબરા તાલુકાના અંતરિયાળ ગ્રામ્ય વિસ્તારોમાં પણ મેઘરાજાએ જોરદાર એન્ટ્રી કરી છે. તાલુકાના કોટડાપીઠા, મોટાદેવળીયા, ઉટવડ, ચરખા, નિલવડા, સુકવડા અને વાંકીયા સહિતના ગામડાઓમાં અનરાધાર વરસાદ વરસ્યો છે. ગ્રામીણ વિસ્તારોમાં સાર્વત્રિક વરસાદ પડતાં સમગ્ર પંથકનું વાતાવરણ આહલાદક અને ઠંડુગાર બની ગયું છે.

મગફળી, કપાસ અને સોયાબીનના પાકને મળ્યું નવું જીવનદાન

બાબરા પંથકમાં પડેલો આ વરસાદ કૃષિ ક્ષેત્ર માટે વરદાનરૂપ સાબિત થયો છે. છેલ્લા કેટલાક સમયથી વરસાદના વિરામ બાદ ઊભા પાકો સુકાવાની ભીતિ સેવાઈ રહી હતી. પરંતુ આ સાર્વત્રિક વરસાદથી જમીનમાં પૂરતો ભેજ મળી રહેતાં વાવેતર કરાયેલા મગફળી, કપાસ અને સોયાબીન સહિતના મુખ્ય પાકોને અમૃત સમાન જીવનદાન મળ્યું છે. પાક બચી જતાં અને તેની ગુણવત્તા સુધરવાની આશા જાગતાં જગતનો તાત ભારે રાજીપો વ્યક્ત કરી રહ્યો છે.

આ પણ વાંચો: Amreli Rain Update: ગ્રામ્ય પંથકમાં ધોધમાર વરસાદ, નાના ભંડારીયામાં શેરીઓ બની પાણીના વહેણ!