પાકિસ્તાનના પૂર્વ વડાપ્રધાન અને ક્રિકેટર ઇમરાન ખાનની પૂર્વ પત્ની જેમિમા ગોલ્ડસ્મિથે 52 વર્ષની ઉંમરે બીજા લગ્ન કરી લીધા છે. જેમિમાએ 62 વર્ષના આઇરિશ-ઓસ્ટ્રેલિયન કરોડપતિ કેમરન ઓ’રાયલી સાથે લગ્ન કર્યા છે. બંનેના લગ્ન ઇમરાન ખાનથી છૂટાછેડાના 22 વર્ષ પછી થયા છે. ઇમરાન અને જેમિમાના છૂટાછેડા 2004માં થયા હતા. જોકે, જેમિમા અને કેમરને પોતે પોતાના લગ્નની જાણકારી સાર્વજનિક કરી ન હતી. જેમિમાની ભાભી જેમિમા જોન્સે આ જાણકારી આપી હતી. જોન્સ, જેમિમાના ભાઈ બેન ગોલ્ડસ્મિથની પત્ની છે. તેમણે 13 સપ્ટેમ્બરે ઇન્સ્ટાગ્રામ પર એક ફોટો શેર કર્યો હતો. જેમિમાએ 1995માં ઇમરાન ખાન સાથે લગ્ન કર્યા હતા જેમિમાએ પ્રથમ લગ્ન ઇમરાન ખાન સાથે 1995 માં કર્યા હતા. તે સમયે જેમિમાની ઉંમર માત્ર 21 વર્ષની હતી, જ્યારે ઇમરાન ખાન 42 વર્ષના હતા. ઇમરાન ત્યારે ક્રિકેટની દુનિયામાં મોટું નામ હતા અને રાજકારણમાં પગ મૂકવાની તૈયારી કરી રહ્યા હતા. બંનેની ઉંમરમાં 21 વર્ષનો તફાવત હતો. આ ઉપરાંત બંનેની સંસ્કૃતિ પણ અલગ હતી. આ જ કારણોસર જેમિમાના માતા-પિતા આ સંબંધને લઈને શરૂઆતમાં ચિંતિત હતા. લગ્ન પછી બંનેને બે પુત્રો થયા, સુલેમાન ઈસા અને કાસિમ. જેમિમા અને ઇમરાનનો જૂન 2004 માં છૂટાછેડા થઈ ગયા. છૂટાછેડા પછી જેમિમા પોતાના બંને બાળકો સાથે લંડન પાછા ફર્યા. ત્યાં તેમણે ડોક્યુમેન્ટરી ફિલ્મમેકર અને સ્ક્રીનરાઈટર તરીકે કામ શરૂ કર્યું. ખાનગી સમારોહમાં થયા લગ્ન ડેઇલી મેઇલના અહેવાલ મુજબ, જેમિમા અને કેમરને એક ખાનગી સમારોહમાં લગ્ન કર્યા. લગ્ન અત્યંત ગુપ્ત રીતે થયા અને તે પહેલાં મીડિયાને તેની કોઈ જાણકારી આપવામાં આવી ન હતી. અહેવાલ મુજબ, બંનેની મુલાકાત એક ફિલ્મ અને ડોક્યુમેન્ટરી પર કામ કરતી વખતે થઈ હતી. કેમરન આ પ્રોજેક્ટના એક્ઝિક્યુટિવ પ્રોડ્યુસર હતા. પહેલાં બંનેમાં મિત્રતા થઈ અને પછી આ સંબંધ આગળ વધ્યો. બંને એક વર્ષથી વધુ સમયથી ચૂપચાપ ડેટ કરી રહ્યા હતા. ત્યારબાદ તેમણે લગ્ન કરી લીધા. કેમરને ઓક્સફોર્ડ યુનિવર્સિટીમાંથી અભ્યાસ કર્યો કેમરન ઓ’રાયલી દિવંગત આઇરિશ મીડિયા ઉદ્યોગપતિ સર એન્થોની ઓ’રાયલીના પુત્ર છે. તેમણે ઓક્સફોર્ડ યુનિવર્સિટીમાંથી અભ્યાસ કર્યો. કેમરન ઓસ્ટ્રેલિયાની મોટી મીડિયા કંપનીઓમાંની એક APN ન્યૂઝ એન્ડ મીડિયાના CEO પણ રહી ચૂક્યા છે. આ કંપની હવે ARN મીડિયાના નામથી ઓળખાય છે. ત્યારબાદ તેમણે ‘બેયાર્ડ કેપિટલ’ નામની પ્રાઇવેટ ઇક્વિટી કંપની શરૂ કરી. કેમરનને તેમના પહેલા લગ્નથી ચાર બાળકો છે. અબજોપતિ પરિવારમાંથી છે જેમિમા જેમિમા ગોલ્ડસ્મિથ દિવંગત અબજોપતિ ઉદ્યોગપતિ સર જેમ્સ ગોલ્ડસ્મિથ અને લેડી એનાબેલ ગોલ્ડસ્મિથની પુત્રી છે. તેમની માતા લંડનની પ્રખ્યાત સોશિયલાઇટ હતી. લેડી એનાબેલનું લગભગ એક વર્ષ પહેલા અવસાન થયું હતું, જ્યારે જેમિમાના પિતા સર જેમ્સનું મૃત્યુ 1997માં થયું હતું. જેમિમા લાંબા સમયથી રાજકારણ, મીડિયા અને સામાજિક કાર્ય સાથે સંકળાયેલી છે. પ્રથમ લગ્ન અને છૂટાછેડા પછી તેમણે પોતાનું અંગત જીવન મોટાભાગે મીડિયાથી દૂર રાખ્યું છે. બીજા લગ્ન વિશે તેમણે અત્યાર સુધી જાહેરમાં કોઈ નિવેદન આપ્યું નથી.