BJPનું ‘સેવા સંકલ્પ અભિયાન’ 17 સપ્ટેમ્બરથી 17 ઓક્ટોબર સુધી દેશભરમાં ચલાવવામાં આવશે. ‘વડનગરથી વારાણસી’ અને ‘વારાણસીથી વડનગર’ સેવા સંકલ્પ બાઇક યાત્રાનો 17 સપ્ટેમ્બરે પ્રારંભ થશે. સવારે 9:30 વાગ્યે વડનગર અને વારાણસીથી એકસાથે યાત્રા રવાના થશે. વડનગરથી કેન્દ્રીય ગૃહમંત્રી અમિત શાહ, મુખ્યમંત્રી ભૂપેન્દ્ર પટેલ સહિત ભાજપના વરિષ્ઠ નેતાઓ યાત્રાને લીલી ઝંડી બતાવશે. જ્યારે વારાણસીમાં રક્ષામંત્રી રાજનાથ સિંહ અને મુખ્યમંત્રી યોગી આદિત્યનાથ સહિતના અનેક નેતાઓ હાજર રહેશે અને યાત્રાને લીલી ઝંડી બતાવશે.
10 રાજ્યોના 193 જિલ્લામાંથી પસાર થશે યાત્રા
આ બાઇક યાત્રા 10 રાજ્યોના 193 જિલ્લાઓ અને લગભગ 1,159 ગામોમાંથી પસાર થશે. આ દરમિયાન કાર્યકર્તાઓ લગભગ 40 હજાર કિલોમીટરનું અંતર કાપશે. દેશભરમાંથી લગભગ 1 હજાર યુવાનો આ યાત્રામાં જોડાશે. યાત્રા દરમિયાન સ્વચ્છતા, નશામુક્તિ, ટીબી મુક્ત ભારત, પ્લાસ્ટિક મુક્ત ભારત અને જળ સંરક્ષણ જેવા અભિયાન ચલાવવામાં આવશે. સાથે જ દરરોજ 25 વૃક્ષોની જાળવણી કરવાનો સંકલ્પ લેવામાં આવશે.
લાભાર્થીઓ અને મહિલાઓ સાથે સંવાદ
યાત્રા દરમિયાન વિવિધ સરકારી યોજનાઓના લાભાર્થીઓ, યુવાનો અને મહિલા સશક્તિકરણ યોજનાઓ સાથે જોડાયેલી મહિલાઓ સાથે પણ સંવાદ કરવામાં આવશે. ગુજરાતમાં 13 સપ્ટેમ્બરથી ચાર ઝોનની ઉપયાત્રાઓ વડનગર માટે રવાના થઈ હતી. સોમનાથ, શ્યામળાજી, પાવાગઢ અને ઉનાઈ માતાજીથી નીકળેલી આ ઉપયાત્રાઓ 16 સપ્ટેમ્બર સુધીમાં વડનગર પહોંચશે.
જળસ્રોતોનું પાણી વડનગર અને વારાણસી લઈ જવાશે
ગુજરાતના વિવિધ જળસ્રોતોમાંથી પાણી એકત્ર કરવામાં આવશે. આ પાણીથી વડનગરમાં હાટકેશ્વર મહાદેવ અને વારાણસીમાં કાશી વિશ્વનાથનો જલાભિષેક કરવામાં આવશે. આ યાત્રાનો અંત 7 ઓક્ટોબરે થશે. આ યાત્રાનો મુખ્ય હેતુ યુવાનોને સેવા, સમાજ અને રાષ્ટ્રનિર્માણ સાથે જોડવાનો છે.
17 સપ્ટેમ્બરે PM મોદીના જન્મદિવસે અભિયાન
અમિત શાહે જણાવ્યું કે આ અભિયાનનો હેતુ જનભાગીદારી દ્વારા વિકસિત ભારતના વિઝનમાં યોગદાન આપવાનો છે. તેમણે જણાવ્યું કે 17 સપ્ટેમ્બરે વડાપ્રધાન નરેન્દ્ર મોદીનો જન્મદિવસ છે. આ ઉપરાંત આ વર્ષે ઓક્ટોબરમાં મુખ્યમંત્રી અને વડાપ્રધાન તરીકે તેમના 25 વર્ષ પણ પૂર્ણ થઈ રહ્યા છે. અમિત શાહે વડાપ્રધાન નરેન્દ્ર મોદીના નેતૃત્વવાળી NDA સરકાર હેઠળ શરૂ કરવામાં આવેલી વિવિધ સામાજિક અને સાંસ્કૃતિક પહેલો વિશે પણ વાત કરી હતી.
સેવા, સુશાસન અને ગરીબોના કલ્યાણ પર ભાર
કેન્દ્રીય આરોગ્યમંત્રી જે.પી. નડ્ડાએ મંગળવારે કહ્યું કે PM મોદીના જન્મદિવસ નિમિત્તે યોજાઈ રહેલું આ અભિયાન સેવા, સુશાસન અને ગરીબોના કલ્યાણ પર કેન્દ્રિત રહેશે. આ સાથે સરકારની યોજનાઓ અને નીતિઓને જમીની સ્તરે લાભાર્થીઓ સુધી પહોંચાડવામાં આવશે. જે.પી. નડ્ડાએ કહ્યું કે સાંજે 7 વાગ્યે લોકો PM મોદીના સારા સ્વાસ્થ્ય અને દેશની સેવા માટે લાંબા આયુષ્યની કામના સાથે ‘આશીર્વાદનો દીવો’ પ્રગટાવશે.