સુરત શહેરના સારોલી વિસ્તારમાં આવેલી જાણીતી સાલાસર ટેક્સટાઈલ માર્કેટમાં અચાનક ભીષણ આગ ફાટી નીકળતાં ભારે અફરાતફરીનો માહોલ સર્જાયો છે. માર્કેટના 5મા માળે અચાનક આગ લાગવાના કારણે ધુમાડાના કાળા ગોટેગોટા દૂર દૂર સુધી જોવા મળ્યા હતા. કાપડના વેપારીઓ અને ગ્રાહકોથી ધમધમતી માર્કેટમાં આગની જાણ થતાં જ લોકોમાં નાસભાગ મચી ગઈ હતી અને જીવ બચાવવા માટે લોકો બહાર દોડી આવ્યા હતા.

આગ લાગવાની ઘટનાની જાણ થતાં જ સુરત ફાયર બ્રિગેડની અનેક ગાડીઓ અને ઉચ્ચ અધિકારીઓનો કાફલો તુરંત સારોલી સ્થિત સાલાસર માર્કેટ ખાતે પહોંચી ગયો હતો. ફાયર ફાઈટરો દ્વારા વોટર કેનન અને ફાયર ફાઈટિંગ સાધનોની મદદથી આગ પર કાબૂ મેળવવા માટે ભારે મથામણ શરૂ કરી દેવામાં આવી છે. 5મા માળે આગ હોવાથી ધુમાડાના કારણે કામગીરીમાં મુશ્કેલીઓનો સામનો કરવો પડી રહ્યો છે.

પ્રાથમિક અનુમાન મુજબ વિદ્યુત વાયરિંગમાં શોર્ટ સર્કિટના કારણે આગ લાગી હોવાની આશંકા વ્યક્ત કરવામાં આવી રહી છે. માર્કેટમાં મોટા પાયે કાપડનો જથ્થો સંગ્રહિત હોવાથી આગ વધુ પ્રસરે નહીં તે માટે ફાયર વિભાગ દ્વારા ચારેય તરફથી પાણીનો મારો ચલાવવામાં આવી રહ્યો છે. સુદૈવે હજુ સુધી કોઈ જાનહાનિના અહેવાલ પ્રાપ્ત થયા નથી, પરંતુ કાપડનો મોટો જથ્થો બળીને ખાખ થવાની ભીતિ સેવાઈ રહી છે.