હારીજ, પાટણ જિલ્લામાં આવેલી સરકારી વિનયન અને વાણિજ્ય કૉલેજમાં 16 સપ્ટેમ્બર 2026ના રોજ “રાષ્ટ્રનિર્માણમાં યુવાનોની ભૂમિકા” વિષય પર એક પ્રેરણાત્મક વ્યાખ્યાન યોજાયું હતું. આ કાર્યક્રમનો મુખ્ય હેતુ યુવાનોમાં રાષ્ટ્રપ્રેમ, જવાબદારી, નેતૃત્વ અને સામાજિક જાગૃતિ વધારવાનો હતો. હેમચંદ્રાચાર્ય ઉત્તર ગુજરાત યુનિવર્સિટી, પાટણના યુનિવર્સિટી કૉઓર્ડીનેટર કમલેશ ઠક્કર મુખ્ય વક્તા તરીકે હાજર રહ્યા હતા. તેમણે પોતાના વક્તવ્યમાં જણાવ્યું કે યુવાનો દેશની સૌથી સક્રિય અને સર્જનાત્મક શક્તિ છે. તેમણે વધુમાં કહ્યું કે યુવાનો શિક્ષણ, સંશોધન, નવીનતા, ટેક્નોલોજી, સામાજિક સેવા અને લોકશાહી મૂલ્યો પ્રત્યેની જવાબદારી દ્વારા રાષ્ટ્રના સર્વાંગી વિકાસમાં મહત્વનું યોગદાન આપી શકે છે. કમલેશ ઠક્કરે યુવાનોને માત્ર કારકિર્દી બનાવવા પૂરતા સીમિત ન રહેતા સમાજ અને રાષ્ટ્ર પ્રત્યેની પોતાની જવાબદારી સમજવા અપીલ કરી હતી. તેમણે કહ્યું કે જાગૃત યુવા, જવાબદાર નાગરિક અને સશક્ત રાષ્ટ્ર એકબીજા સાથે જોડાયેલા છે. જો યુવાનોની ઊર્જા અને પ્રતિભાનો સકારાત્મક દિશામાં ઉપયોગ થાય, તો વિકસિત અને આત્મનિર્ભર ભારત બનાવવાની પ્રક્રિયાને વધુ વેગ મળી શકે છે. આ પ્રસંગે કૉલેજના આચાર્ય ડૉ. ટી. પી. આનંદ, અધ્યાપકો અને મોટી સંખ્યામાં વિદ્યાર્થીઓ હાજર રહ્યા હતા. વિદ્યાર્થીઓએ વક્તાના વિચારો ધ્યાનપૂર્વક સાંભળ્યા અને રાષ્ટ્રનિર્માણમાં પોતાની સક્રિય ભૂમિકા ભજવવા માટે પ્રેરણા મેળવી. કાર્યક્રમના અંતે ઉપસ્થિત સૌનો આભાર માનવામાં આવ્યો હતો.