ટીમ ઇન્ડિયાના સ્ટાર ઓપનર અભિષેક શર્માએ અફઘાનિસ્તાન સામેની T20 શ્રેણીમાં શાનદાર પ્રદર્શન કર્યું છે. દિલ્હીના અરુણ જેટલી સ્ટેડિયમમાં રમાયેલી ત્રીજી અને આખરી T20 મેચમાં તેણે બેજોડ સદી ફટકારતા માત્ર 34 બોલમાં 108 રન બનાવ્યા હતા, જેમાં 11 ગગનચુંબી છગ્ગા પણ સામેલ છે. અભિષેક ભારત-અફઘાનિસ્તાન T20 શ્રેણીમાં સૌથી વધુ 229 રન બનાવવાની સાથે તે સૌથી વધુ 22 છગ્ગા ફટકારનાર બેટ્સમેન પણ બની ગયો છે. આ સાથે જ તેણે વર્ષ 2026માં સૌથી વધુ T20 છગ્ગા ફટકારનારા બેટ્સમેનોની યાદીમાં 15 વર્ષીય વૈભવ સૂર્યવંશીને પાછળ છોડી દીધા છે. હવે વૈભવ અને અભિષેક વચ્ચે છગ્ગાના મામલે 10 છગ્ગાનું અંતર છે. ઉલ્લેખનીય છે કે, વૈભવ સૂર્યવંશીને અફઘાનિસ્તાન સામેની આ T20 શ્રેણીમાં એક પણ મેચ રમવાની તક મળી ન હતી.

છગ્ગા ફટકારનારા બેટ્સમેનોની યાદીમાં ત્રીજા સ્થાને

અભિષેક શર્મા આ વર્ષે T20 ક્રિકેટમાં સૌથી વધુ છગ્ગા ફટકારનારા બેટ્સમેનોની યાદીમાં ત્રીજા સ્થાને પહોંચી ગયો છે. વર્ષ 2026માં તેના નામે અત્યાર સુધી 96 છગ્ગા નોંધાયેલા છે, અને તે માત્ર 4 છગ્ગા ફટકારતા જ પોતાના સદી (છગ્ગા) પૂરા કરી લેશે. અભિષેકે આ વર્ષે 41 મુકાબલામાં 1306 રન બનાવ્યા છે, જેમાં 2 સદી અને 10 અડધી સદી સામેલ છે.

વૈભવ સૂર્યવંશી સાતમાં સ્થાને સરકી ગયો

બીજી બાજુ, વૈભવ સૂર્યવંશી 86 છગ્ગા સાથે આ યાદીમાં સાતમા સ્થાને સરકી ગયો છે. જો અફઘાનિસ્તાન સામેની આ શ્રેણીમાં તેને રમવાની તક મળી હોત, તો અભિષેક અને તેની વચ્ચે જોરદાર સ્પર્ધા જોવા મળત. વૈભવે આ 86 છગ્ગા માત્ર 22 મેચોમાં જ ફટકાર્યા છે. તે આ વર્ષે 1 સદીની સાથે 7 અડધી સદી ફટકારી ચૂક્યો છે.

ફિન એલને ફટકાર્યા સૌથી વધુ છગ્ગા

ન્યૂઝીલેન્ડના વિસ્ફોટક ઓપનર બેટ્સમેન ફિન એલન વર્ષ 2026માં સૌથી વધુ T20 છગ્ગા ફટકારનારા ખેલાડીઓની રેસમાં સૌથી આગળ ચાલી રહ્યો છે. તેણે આ વર્ષે વિવિધ T20 લીગમાં ભાગ લઈને કુલ 101 છગ્ગા ફટકાર્યા છે. તેઓ વર્ષ 2026 માં 100 T20 છગ્ગાનો આંકડો પાર કરનાર એકમાત્ર બેટ્સમેન છે. આ યાદીમાં નિકોલસ પૂરન બીજા ક્રમે છે.

ટોપ-10માં માત્ર બે ભારતીય ખેલાડીઓ

જો ટોપ-10 બેટ્સમેનોની વાત કરીએ તો, અભિષેક શર્મા અને વૈભવ સૂર્યવંશી જ આ યાદીમાં બે એવા ભારતીય ખેલાડીઓ છે જે નજરે પડે છે. આ યાદીમાં ત્રીજા ભારતીય ખેલાડી તરીકે ઇશાન કિશન 76 છગ્ગા સાથે 13મા ક્રમે છે.

સૌથી વધુ છગ્ગા ફટકારના બેટ્સમેનની યાદી

ફિન એલન 101

નિકોલસ પૂરન 99

અભિષેક શર્મા 96

રેયાન રિકલ્ટન 96

મિશેલ માર્શ 95

દાસુન શનાકા 88

વૈભવ સૂર્યવંશી 86