એશિયન ગેમ્સ 2026ના મહિલા ક્રિકેટ ક્વાર્ટર ફાઇનલમાં ભારતીય મહિલા ટીમે જાપાનને 8 વિકેટે હરાવીને સેમિફાઇનલમાં પ્રવેશ કર્યો છે. ભારતીય બોલરોએ શરૂઆતથી જ જાપાની બેટરો પર દબાણ બનાવી રાખ્યું હતું. પરિણામે જાપાનની સમગ્ર ટીમ માત્ર 57 રનમાં ઓલઆઉટ થઈ ગઈ હતી.ટોસ જીતીને પ્રથમ બોલિંગ કરવાનો નિર્ણય ભારતીય ટીમ માટે ફાયદાકારક સાબિત થયો. ભારતીય સ્પિનરો સામે જાપાનના બેટરો લાંબો સમય ટકી શક્યા નહોતા. 58 રનના નાના લક્ષ્યનો પીછો કરવા ઉતરેલી ટીમ ઈન્ડિયાએ માત્ર 30 બોલમાં મેચ પૂરો કરીને સેમિફાઇનલમાં પોતાનું સ્થાન નિશ્ચિત કર્યું.

શ્રી ચરણીનો શાનદાર સ્પેલ

ભારતની જીતમાં ડાબોડી સ્પિનર શ્રી ચરણી સૌથી મોટી હીરો રહી હતી. તેમણે પોતાની T20 કારકિર્દીનું શ્રેષ્ઠ પ્રદર્શન કરતાં માત્ર 10 રન આપીને 4 વિકેટ ઝડપી હતી.જાપાનની બેટિંગ સામે ભારતીય બોલિંગના દબદબાનો અંદાજ એ વાત પરથી લગાવી શકાય છે કે જાપાની ટીમ પોતાની સમગ્ર ઇનિંગ્સમાં માત્ર 3 બાઉન્ડરી ફટકારી શકી હતી.જાપાનની શરૂઆત પણ ધીમી રહી હતી. પાવરપ્લેના પ્રથમ 6 ઓવરમાં જાપાને માત્ર 24 રન બનાવ્યા હતા. ભારતીય બોલરોએ રન બનાવવાની કોઈ તક આપી નહોતી.7મી ઓવરમાં શ્રી ચરણી બોલિંગ કરવા આવી અને સતત 2 બોલમાં જાપાનને 2 મોટા ઝટકા આપ્યા. તેમણે ઓપનર હારુના ઇવાસાકી અને કેપ્ટન માઈ યાનાગિદાને પેવેલિયન મોકલી દીધા હતા.પિચ પરથી મળતા ટર્ન અને ઉછાળનો શ્રી ચરણી સહિત અન્ય ભારતીય સ્પિનરોએ પણ ભરપૂર ફાયદો ઉઠાવ્યો હતો. બીજી તરફ શેફાલી વર્માએ પાર્ટ-ટાઇમ ઓફ સ્પિનર તરીકે કસેલી બોલિંગ કરી હતી. તેમણે 13 રન આપીને 2 વિકેટ ઝડપી હતી. જાપાનના 2 ખેલાડીઓ રનઆઉટ પણ થયા હતા.

શેફાલી વર્માની તોફાની બેટિંગ

58 રનના લક્ષ્યનો પીછો કરવા ઉતરેલી ભારતીય ટીમને શેફાલી વર્માએ ઝડપી શરૂઆત અપાવી હતી. જોકે ભારતે શરૂઆતમાં જ 2 વિકેટ ગુમાવી દીધી હતી.ત્યારબાદ શેફાલીએ રિચા ઘોષ સાથે મળીને ભારતીય ટીમને સરળતાથી જીત સુધી પહોંચાડી હતી. શેફાલીએ માત્ર 15 બોલમાં અણનમ 40 રનની તોફાની ઇનિંગ્સ રમી હતી. તેમની ઇનિંગ્સમાં 6 ચોગ્ગા અને 2 છગ્ગાનો સમાવેશ થયો હતો.બીજી તરફ રિચા ઘોષે પણ માત્ર 6 બોલમાં અણનમ 12 રન બનાવ્યા હતા. બંનેની ઝડપી બેટિંગના કારણે ભારતે માત્ર 30 બોલમાં લક્ષ્ય હાંસલ કરી લીધું હતું.

ભારતની નજર હવે સેમિફાઇનલ પર

જાપાન સામેની આ શાનદાર જીત સાથે ભારતીય મહિલા ટીમે એશિયન ગેમ્સ 2026ની સેમિફાઇનલમાં પ્રવેશ કર્યો છે. બોલિંગમાં શ્રી ચરણીના 4 વિકેટ અને બેટિંગમાં શેફાલી વર્માની તોફાની ઇનિંગ્સ ભારતની જીતના મુખ્ય કારણો રહ્યા.ભારતીય ટીમે શરૂઆતથી જ મેચ પર પોતાનું નિયંત્રણ જાળવી રાખ્યું હતું. હવે ટીમની નજર સેમિફાઇનલમાં પણ આવું જ પ્રદર્શન કરીને એશિયન ગેમ્સમાં વધુ એક સુવર્ણ ચંદ્રક તરફ આગળ વધવા પર રહેશે.

આ પણ વાંચો – Team India : ટીમ ઈન્ડિયાએ ઐતિહાસક જીત સાથે કેનેડાના આ રેકોર્ડની કરી બરાબરી