અમેરિકામાં એક શીખ ટ્રક ડ્રાઈવર પર જીવલેણ હુમલાની ચોંકાવનારી ઘટના સામે આવી છે. વ્યોમિંગના એક ‘રેસ્ટ એરિયા’ (વિશ્રામ સ્થળ) પર, એક વ્યક્તિએ ડ્રાઈવરનો પીછો કરીને રેસ્ટરૂમમાં પ્રવેશ કર્યો અને તેના પર અનેક વાર છરી વડે હુમલો કર્યો. આ હુમલામાં ડ્રાઈવર ગંભીર રીતે ઘાયલ થયો છે અને હાલમાં હોસ્પિટલમાં દાખલ છે. પોતાની સુરક્ષાને ધ્યાનમાં રાખીને, પીડિતે પોતાની ઓળખ માત્ર અટક ‘સિંઘ’ તરીકે જ જાહેર કરવાની વિનંતી કરી છે.

અમેરિકન સમાચાર એજન્સી અનુસાર, સિંઘે આ હિંસા અંગે ઊંડો ભય વ્યક્ત કર્યો હતો અને તેમને શા માટે નિશાન બનાવવામાં આવ્યા તે અંગે મૂંઝવણ દર્શાવી હતી. તેમણે કહ્યું, “મને ખબર નથી કે આવું કેમ થયું. મને ખબર નથી કે તેણે મારા પર હુમલો કેમ કર્યો.”

‘તેમણે મને નવું જીવન આપ્યું’

સિંઘે જણાવ્યું કે ઘટનાસ્થળે હાજર એક હિસ્પેનિક પરિવારે તેમની મદદ કરી અને તેમનો જીવ બચાવ્યો. તેમણે કહ્યું, “તેમણે મને નવું જીવન આપ્યું.”

ગંભીર રીતે ઘાયલ સિંઘને જોઈને તે પરિવારે તાત્કાલિક મદદ માટે દોટ મૂકી. તેમણે સિંઘના ઘા પર પ્રાથમિક સારવાર કરી અને ઇમરજન્સી તબીબી સહાય ન આવે ત્યાં સુધી તેમની સંભાળ રાખી. સિંઘે તેમના ત્વરિત પગલાંને કારણે જ પોતાનો જીવ બચી શક્યો હોવાનું શ્રેય તેમને આપ્યું હતું. બુધવાર રાત સુધી સિંઘ હોસ્પિટલમાં સારવાર હેઠળ હતા; તેઓ છાતી અને પાંસળીઓમાં થયેલી ઈજાઓ તેમજ શરીરના અન્ય ભાગો પર થયેલા અનેક ઘામાંથી સાજા થઈ રહ્યા હતા.

આરોપીની ધરપકડ; હત્યાના પ્રયાસનો આરોપ દાખલ

સત્તાવાળાઓએ છરીના હુમલાના સંબંધમાં 45 વર્ષીય એન્ડ્રુ ક્રિસ બઝડોકની ધરપકડ કરી છે. આરોપનામાના દસ્તાવેજો અનુસાર, બઝડોક પર ‘ફર્સ્ટ-ડિગ્રી મર્ડર’ (ગંભીર શ્રેણીની હત્યા)ના પ્રયાસનો આરોપ મૂકવામાં આવ્યો છે. જોકે, દસ્તાવેજોમાં હુમલા પાછળના કોઈ ચોક્કસ કારણ કે ઈરાદાનો ઉલ્લેખ કરવામાં આવ્યો નથી.

યુએસ ડિપાર્ટમેન્ટ ઓફ હોમલેન્ડ સિક્યુરિટીની ‘X’ પોસ્ટ બાદ હુમલો

યુએસ ડિપાર્ટમેન્ટ ઓફ હોમલેન્ડ સિક્યુરિટી (DHS) દ્વારા શીખ ટ્રક ડ્રાઇવરો દર્શાવતું AI-જનરેટેડ પોસ્ટર શેર કર્યાના થોડા સમય પછી આ ઘટના બની. પોસ્ટરમાં ‘સિંઘ’ નામના શીખ વ્યક્તિને નિશાન બનાવવામાં આવ્યું હતું અને તેનું શીર્ષક “ટ્રાન્સફોર્મર્સ: એજ ઓફ ડિપોર્ટેશન્સ” હતું. તેમાં DHS લોગો ધરાવતા ટ્રાન્સફોર્મર સાથે પાઘડી પહેરેલા શીખ વ્યક્તિને દર્શાવવામાં આવ્યું હતું. પોસ્ટમાં શીખ ટ્રક ડ્રાઇવરોને અમેરિકન રસ્તાઓ પરથી ઉતરીને દેશ છોડી દેવાનું અસરકારક રીતે કહેવામાં આવ્યું હતું.

પોસ્ટ બાદ DHSને નોંધપાત્ર ટીકાનો સામનો કરવો પડ્યો. ફોક્સ 7 ઓસ્ટિન માટે શીખ-અમેરિકન ન્યૂઝ એન્કર એલેક નોલાને તેને જાતિવાદી અને અપમાનજનક ગણાવીને તેની નિંદા કરી. પોતાના પરિવારના ઇતિહાસનો ઉલ્લેખ કરતા, તેમણે નોંધ્યું કે તેમના દાદા અને પરદાદા ભારતથી અમેરિકા સ્થળાંતરિત થયા હતા, જ્યારે તેમના દાદા ટ્રક ડ્રાઇવર તરીકે કામ કરતા હતા.

આ પણ વાંચો: કૂતરાઓએ ફાડી ખાધો મૃતદેહ… 16 વર્ષની સગીરા પર સામૂહિક બળાત્કાર અને હત્યા; 4 લોકોને દબોચ્યા