રાજ્ય પરીક્ષા બોર્ડ (SEB) દ્વારા માધ્યમિક શાળાઓમાં શિક્ષક તરીકે નિમણૂક મેળવવા માટેની શિક્ષક અભિરુચિ કસોટી (TAT Secondary) ની મુખ્ય પરીક્ષાનું અમદાવાદ સહિત રાજ્યભરના તમામ મોટા શહેરોમાં આયોજન કરવામાં આવ્યું છે. પ્રિલિમિનરી પરીક્ષા પાસ કરનારા 75,000થી વધુ ઉમેદવારો આ મુખ્ય કસોટીમાં બેસશે. સમગ્ર રાજ્યમાં કુલ 493 પરીક્ષા કેન્દ્રો ઊભા કરવામાં આવ્યા છે. અમદાવાદમાં 171 સેન્ટર પર 31 હજારથી વધુ પરીક્ષાર્થી
અમદાવાદ જિલ્લા શિક્ષણાધિકારી (DEO) કચેરી દ્વારા શાંતિપૂર્ણ માહોલમાં પરીક્ષા સંપન્ન થાય તે માટે વ્યાપક વ્યવસ્થાઓ ગોઠવવામાં આવી છે. અમદાવાદ શહેરના પૂર્વ વિસ્તારમાં 84 કેન્દ્રો પર 15 હજારથી વધુ અને પશ્ચિમ વિસ્તારમાં 87 કેન્દ્રો પર 16 હજારથી વધુ ઉમેદવારો પરીક્ષા આપશે. કોઈપણ અનિચ્છનીય ઘટના અટકાવવા માટે કેન્દ્ર સંચાલકો, બ્લોક સુપરવાઇઝરો તેમજ ઓબ્ઝર્વરોની નિમણૂક કરી તેમને ખાસ તાલીમથી સજ્જ કરાયા છે. આ ઉપરાંત દરેક સેન્ટર પર સરકાર નિયુક્ત પ્રતિનિધિઓ તૈનાત રહીને સમગ્ર પ્રક્રિયાનું સુપરવિઝન કરી રહ્યા છે. પ્રિલિમમાં 1.85 લાખ પૈકી 75,980 ક્વોલિફાય થયા
રાજ્ય પરીક્ષા બોર્ડ દ્વારા અગાઉ લેવાયેલી TAT-S પ્રિલિમિનરી પરીક્ષામાં રાજ્યભરમાંથી અંદાજે 1.85 લાખ જેટલા ઉમેદવારો ઉપસ્થિત રહ્યા હતા. પરિણામ બાદ તેમાંથી 75,980 ઉમેદવારો મુખ્ય કસોટી આપવા માટે મેરિટમાં સ્થાન મેળવી ક્વોલિફાય જાહેર થયા હતા. આ તમામ ઉમેદવારો માટે નિયત પદ્ધતિ મુજબ બે અલગ-અલગ વર્ણનાત્મક પેપરની પરીક્ષા યોજવામાં આવી રહી છે. SOP ના ચુસ્ત પાલન સાથે ભાષા અને પદ્ધતિશાસ્ત્રની કસોટી
આ મુખ્ય પરીક્ષા બે શિફ્ટમાં લેવામાં આવી રહી છે. પ્રથમ પેપર સવારે 10:30થી બપોરે 1:00 વાગ્યા દરમિયાન યોજાશે, જેમાં ભાષા ક્ષમતા અંતર્ગત નિબંધ, સંક્ષેપીકરણ, પત્રલેખન, ચર્ચાપત્ર અને વ્યાકરણને લગતા પ્રશ્નો પૂછવામાં આવશે. ત્યારબાદ બીજી શિફ્ટમાં બપોરે 3:00થી સાંજે 6:00 વાગ્યા સુધી ઉમેદવારે પસંદ કરેલા વિષયનું કન્ટેન્ટ (વિષયવસ્તુ) અને મેથડ (શિક્ષણ પદ્ધતિ) આધારિત બીજું પેપર લેવાશે. ઉમેદવારો ગુજરાતી માધ્યમના 9 અને અંગ્રેજી માધ્યમના 7 મળી કુલ 16 વિષયોમાં પરીક્ષા આપશે. રાજ્ય પરીક્ષા બોર્ડ દ્વારા જારી કરાયેલી સ્ટાન્ડર્ડ ઓપરેટિંગ પ્રોસિજર (SOP) નું અક્ષરશઃ પાલન કરવાની કડક તાકીદ તમામ કેન્દ્ર સંચાલકોને કરવામાં આવી છે.