ગોધરા શહેરમાં 20 સપ્ટેમ્બર, રવિવારના રોજ ગણેશ વિસર્જન યાત્રા ચાલી રહી હતી. આ દરમિયાન બપોર પછી અચાનક વરસાદ શરૂ થયો. શહેર અને આસપાસના વિસ્તારોમાં વરસાદી માહોલ છવાઈ ગયો. અચાનક વરસાદ આવતા શહેરના રસ્તાઓ પર પાણી ભરાઈ ગયા અને વાતાવરણમાં ઠંડક પ્રસરી. છેલ્લા કેટલાક સમયથી લોકો ગરમી અને બફારાથી પરેશાન હતા. વરસાદ આવતા તેમને ગરમીમાંથી રાહત મળી છે. જોકે, ગણેશ વિસર્જન યાત્રા વચ્ચે જ વરસાદ શરૂ થતા ભક્તો અને આયોજકોને વરસાદમાં જ યાત્રા આગળ વધારવી પડી. ગોધરામાં ગણેશ વિસર્જન યાત્રા માટે જિલ્લા વહીવટી તંત્ર અને પોલીસ તંત્રએ બધી તૈયારીઓ કરી હતી. યાત્રાના આખા રૂટ પર સુરક્ષા વ્યવસ્થા ગોઠવવામાં આવી હતી. વરસાદ પડવા છતાં ગણેશ ભક્તોનો ઉત્સાહ ઓછો થયો નથી. ભક્તો બાપ્પાને ભાવપૂર્વક વિદાય આપવા માટે યાત્રામાં જોડાયા છે. વરસાદના કારણે વિસર્જન યાત્રામાં થોડો અવરોધ આવ્યો. તેમ છતાં, ભક્તો ‘ગણપતિ બાપ્પા મોરિયા’ના જયઘોષ સાથે ઉત્સાહમાં જોવા મળ્યા.