ભાડજમાં આવેલા ધ સ્પાયર એપાર્ટમેન્ટમાં ગણેશોત્સવની ભક્તિભાવપૂર્વક ઉજવણી કરવામાં આવી રહી છે. આ એપાર્ટમેન્ટમાં પ્રથમ વર્ષે ગણેશજીની સ્થાપના કરવામાં આવી છે. સાત દિવસના આ ઉત્સવ દરમિયાન વિવિધ ધાર્મિક કાર્યક્રમો, પૂજા-અર્ચના, મહાઆરતી અને ભજન-કીર્તનનું આયોજન કરાયું છે. ગણપતિ બાપ્પાના આગમનથી સમગ્ર સોસાયટીમાં ભક્તિમય અને આનંદનો માહોલ છવાયો છે. ગણેશ ચતુર્થીના શુભ દિવસે ધ સ્પાયરના રહિશો દ્વારા શાસ્ત્રોક્ત વિધિ સાથે ગણપતિ બાપ્પાની મૂર્તિની સ્થાપના કરવામાં આવી હતી. વિધિવત સ્થાપના પછી ગણેશજીનું પૂજન-અર્ચન કરાયું હતું. સોસાયટીના રહિશોએ પરિવારની સુખ-શાંતિ, સમૃદ્ધિ અને સારા સ્વાસ્થ્ય માટે પ્રાર્થના કરી હતી. ગણપતિ બાપ્પાના જયઘોષ સાથે યોજાયેલી સ્થાપના વિધિમાં મોટી સંખ્યામાં રહિશો જોડાયા હતા. ગણેશોત્સવના ભાગરૂપે સોસાયટીની મહિલાઓ દ્વારા વિશેષ ભજન સંધ્યાનું પણ આયોજન કરાયું હતું. આ પ્રસંગે મહિલાઓએ ગણેશ વંદના અને વિવિધ ભક્તિગીતો રજૂ કરીને વાતાવરણને ભક્તિમય બનાવ્યું હતું. ભજન-કીર્તન દરમિયાન રહિશોએ પણ ઉત્સાહપૂર્વક ભાગ લીધો હતો. નાના બાળકો અને યુવાનોમાં પણ ગણેશોત્સવને લઈને ખાસ ઉત્સાહ જોવા મળ્યો હતો. ગણેશોત્સવના સાતમા દિવસે ગણપતિ બાપ્પાને છપ્પન ભોગનો અન્નકૂટ ધરાવાયો હતો. સોસાયટીના રહિશો દ્વારા ઘરે બનાવેલી વિવિધ પ્રકારની વાનગીઓ અને પ્રસાદથી આ અન્નકૂટ તૈયાર કરાયો હતો. આ ભોગ બાપ્પાને ભક્તિપૂર્વક અર્પણ કરવામાં આવ્યો. છપ્પન ભોગના દર્શન માટે સોસાયટીના રહિશો ઉપરાંત આસપાસના લોકો અને પરિવારજનો પણ હાજર રહ્યા હતા. ભક્તોએ ગણપતિ બાપ્પાના દર્શન કરી પ્રસાદ લીધો હતો. સાત દિવસના આ ધાર્મિક મહોત્સવ દરમિયાન સવાર-સાંજ નિયમિત રીતે મહાઆરતી, કીર્તન અને વિધિવત પૂજા-અર્ચના કરવામાં આવી રહી છે. ગણેશજીની આરતી અને ભક્તિગીતોના સ્વરોથી સમગ્ર ધ સ્પાયરનું વાતાવરણ ગુંજી ઊઠે છે. સોસાયટીના રહિશો સામૂહિક રીતે ધાર્મિક કાર્યક્રમોમાં જોડાઈને ગણેશોત્સવની ઉજવણીને વધુ ભાવસભર બનાવી રહ્યા છે. આ સમગ્ર ગણેશોત્સવ દરમિયાન ‘ગણપતિ બાપ્પા મોરિયા’ના જયઘોષથી ધ સ્પાયર ભક્તિમય બની રહ્યું છે. સાત દિવસના આ ઉત્સવને ઉત્સાહ, શ્રદ્ધા અને એકતાના માહોલમાં ઉજવવા માટે સોસાયટીના રહિશોમાં વિશેષ ઉમંગ જોવા મળી રહ્યો છે.