ગુજરાતના જાણીતા યાત્રાધામ અંબાજીમાં દર વર્ષે ભાદરવી પૂનમનો મોટો મેળો ભરાય છે. આ મેળામાં લાખો ભક્તો પોતાના ઘરેથી ‘બોલ માડી અંબે, જય જય અંબે’ના નારા લગાવતા પગપાળા નીકળે છે. આ પદયાત્રીઓની સેવા માટે ઠેર ઠેર સેવા કેમ્પ શરૂ થાય છે. આવી જ એક સેવા વિસનગર નજીક આવેલા જય શ્રી સિદ્ધેશ્વરી આઈ શ્રી ખોડિયાર માતાજીના મંદિર પરિસરમાં છેલ્લા 36 થી 37 વર્ષથી સતત ચાલી રહી છે. આ સેવા કેમ્પ વિશે શ્રી ખોડીદાસ મંગળદાસ પટેલે માહિતી આપતા જણાવ્યું કે, મા અંબાના આશીર્વાદ અને સ્વયંસેવકોની મહેનતથી છેલ્લા સાડા ત્રણ દાયકાથી પણ વધુ સમયથી આ સેવા સતત ચાલી રહી છે. શરૂઆતમાં નાના પાયે શરૂ થયેલો આ કેમ્પ આજે મોટી સેવાનું કેન્દ્ર બન્યો છે. આ સેવા કેમ્પ ભાદરવા સુદ પાંચમથી શરૂ થઈને બારસ, તેરસ અને પૂનમ સુધી દિવસ-રાત ચાલુ રહે છે. વિસનગર અને આસપાસના રસ્તાઓ પરથી પસાર થતા હજારો પદયાત્રીઓ અહીં આરામ કરીને ખુશી અનુભવે છે. કેમ્પમાં આવતા ભક્તો માટે 24 કલાક શુદ્ધ પીવાનું ઠંડું પાણી, ગરમા-ગરમ ચા અને તાજા ગાંઠિયા જેવા પૌષ્ટિક નાસ્તાની સારી વ્યવસ્થા કરવામાં આવે છે. લાંબી પદયાત્રાથી થાકેલા યાત્રાળુઓ માટે ઠંડા પીણાં અને છાશ પણ આપવામાં આવે છે. આ સેવા યજ્ઞમાં અમદાવાદથી આવતી સેવાભાવી મંડળીઓ અને ગ્રૂપો પણ ઉત્સાહથી જોડાય છે. તેમના દ્વારા ખાસ બે દિવસ માટે કેમ્પમાં આવતા તમામ પદયાત્રીઓ માટે શુદ્ધ અને સ્વાદિષ્ટ ભોજન-પ્રસાદની વ્યવસ્થા કરવામાં આવે છે. કેમ્પમાં માત્ર ખાવા-પીવાની જ નહીં, પરંતુ પદયાત્રીઓના પગના દુખાવા અને થાક દૂર કરવા માટે આરામની પૂરતી સુવિધા, માલિશ અને પ્રાથમિક દવાઓની પણ વ્યવસ્થા હોય છે. કેમ્પના સ્વયંસેવકો દિવસ-રાત જોયા વગર પ્રેમથી પદયાત્રીઓની સેવામાં હાજર રહે છે.