નોર્થ કોરિયાએ રવિવારે એક નવી હથિયાર પ્રણાલીનું પરીક્ષણ કર્યું. સરકારી એજન્સી KCNAની તસવીરો અનુસાર, તેમાં હાઇપરસોનિક મિસાઇલ હ્વાસોંગ-11Maનું પરીક્ષણ કરવામાં આવ્યું હતું. નોર્થ કોરિયાના નેતા કિમ જોંગ ઉન પોતાની પુત્રી સાથે પરીક્ષણ જોવા પહોંચ્યા. તેમણે કહ્યું કે આ હથિયારનો વિકાસ દેશની યુદ્ધ તૈયારીઓને મજબૂત બનાવશે અને દુશ્મનો માટે ‘લાઇલાજ માથાનો દુખાવો’ પેદા કરશે. દક્ષિણ કોરિયાની સેનાના જણાવ્યા અનુસાર, નોર્થ કોરિયાએ પૂર્વી તટ પર આવેલા વોનસાન વિસ્તારમાંથી લગભગ 3 કલાકના અંતરે બે ટૂંકી દૂરીની મિસાઇલો છોડી હતી. આ મિસાઇલો સમુદ્રમાં આશરે 450 અને 600 કિલોમીટર સુધી ગઈ હતી. જાપાનની સેનાએ જણાવ્યું કે બંને મિસાઇલો તેના વિશેષ આર્થિક ક્ષેત્ર (EEZ)ની બહાર સમુદ્રમાં પડી હતી. તસવીરોમાં હ્વાસોંગ-11Ma મિસાઇલ જોવા મળી KCNAએ મિસાઇલ પરીક્ષણની તસવીરો જાહેર કરી. તેમાં ટ્રકો પરથી બે મિસાઇલ લોન્ચ થતી જોવા મળી. મિસાઇલોના આગળના ભાગમાં શંકુ જેવી આકૃતિ અને વિંગ્સ જેવા ભાગો નજરે પડ્યા. એક તસવીરમાં કિમ જોંગ ઉન નિરીક્ષણ સ્ક્રીન જોતા નજરે પડ્યા. સ્ક્રીન પર હ્વાસોંગ-11Ma નામ લખેલું હતું. ઉત્તર કોરિયા અગાઉ આ મિસાઇલને હાઇપરસોનિક હથિયાર ગણાવી ચૂક્યું છે. જોકે, કિમે આ પરીક્ષણ દરમિયાન નવી હથિયાર પ્રણાલીનું નામ જણાવ્યું નહોતું.