વિશ્વવિખ્યાત અંબાજી ધામમાં ભાદરવી પૂનમ મહામેળાનો આજે ત્રીજો દિવસ છે. માં અંબાના દર્શન માટે મોટી સંખ્યામાં શ્રદ્ધાળુઓ અંબાજી તરફ આવી રહ્યા છે. પગપાળા યાત્રા કરીને વિવિધ શહેરોમાંથી લોકો પોતાની શ્રદ્ધા સાથે માં અંબાના ધામે પહોંચી રહ્યા છે. આ દરમિયાન સુરતથી અંબાજી સુધીની સાયકલ યાત્રા પણ આજે અંબાજીના ત્રિસુળીયા ઘાટ ખાતે પહોંચી. આ યાત્રા 19 સપ્ટેમ્બરના રોજ સુરતથી શરૂ થઈ હતી. 50થી વધુ સાયકલિસ્ટોએ લાંબી મુસાફરી પૂરી કરીને આજે અંબાજી ધામની સરહદમાં પ્રવેશ કર્યો. ત્રિસુળીયા ઘાટ પહોંચેલા સાયકલ યાત્રિકોમાં માં અંબાના દર્શનની ખુશી જોવા મળી. શ્રદ્ધાળુઓએ ‘જય અંબે’ના નાદ સાથે યાત્રા પૂરી કરી. ભાદરવી પૂનમના મહામેળાને કારણે અંબાજી તરફ જતા રસ્તાઓ પર પગપાળા યાત્રિકો અને સાયકલ સવારો સહિત ભક્તિમય માહોલ છે.