જૂનાગઢ જિલ્લામાં માત્ર એક દિવસના વિરામ બાદ ફરી એકવાર હવામાનમાં પલટો આવ્યો છે અને વિસાવદર તાલુકા સહિત આસપાસના ગ્રામ્ય પંથકમાં ધોધમાર વરસાદ શરુ થયો છે. વિસાવદરના ગ્રામીણ વિસ્તારોમાં બપોર પછી અચાનક આકાશમાં કાળાડિબાંગ વાદળો ઘેરાયા હતા અને ગાજવીજ સાથે વાવણી લાયક વરસાદ તૂટી પડ્યો હતો. આ મૌસમમાં વરસાદનું ફરી આગમન થતાં સ્થાનિક ખેડૂતોમાં આનંદની લહેર છવાઈ ગઈ છે અને લાંબા સમયથી વરસાદની રાહ જોઈ રહેલા ગ્રામજનોને મોટી રાહત મળી છે.
જાંબુડી, સતાધાર અને માંડાવડમાં મુશળધાર વરસાદ
વિસાવદર તાલુકાના મુખ્ય ગામો અને યાત્રાધામ વિસ્તારો જેવા કે જાંબુડી, સતાધાર, અને માંડાવડ સહિતના આસપાસના ગ્રામ્ય પંથકમાં જોરદાર વરસાદ નોંધાયો છે. રોડ-રસ્તા પર પાણી ફરી વળ્યા હતા અને નદી-નાળાઓમાં નવા નીરની આવક થવાના એંધાણ વર્તાઈ રહ્યા છે. અચાનક શરૂ થયેલા આ વરસાદથી વાતાવરણમાં ઠંડક પ્રસરી ગઈ છે. સ્થાનિક રહીશોના જણાવ્યા મુજબ, વાદળછાયા વાતાવરણ બાદ તૂટી પડેલા આ વરસાદથી સમગ્ર પંથક ભીંજાઈ ગયો છે.
ઉભા પાકને જીવનદાન મળતાં ખેડૂતોમાં ખુશીની લહેર
આજના વરસાદથી સૌથી મોટો ફાયદો ખેતી ક્ષેત્રે જોવા મળી રહ્યો છે. વિસાવદર અને આસપાસના ગામોમાં વાવેતર કરેલા મગફળી, કપાસ સહિતના વિવિધ મોસમી પાકોને આ વરસાદથી મોટું જીવનદાન મળ્યું છે. પાકને છેલ્લી ઘડીએ જરૂરી પાણી મળી રહેતાં ઉત્પાદન સારું થવાની આશા વધી ગઈ છે. ચોમાસાના આ સમયસરના વરસાદને કારણે પાક સુકાઈ જવાની ભીતિ ટળી છે અને ખેડૂતોને આર્થિક નુકસાનમાંથી મોટી રાહત મળી છે.