ઈરાને ચેતવણી આપી છે કે જો અમેરિકા અથવા ઇઝરાયલ તેના પર ફરીથી હુમલો કરશે, તો પશ્ચિમ એશિયામાં ચાલી રહેલું યુદ્ધ હિન્દ મહાસાગર સુધી ફેલાઈ શકે છે. AFPના જણાવ્યા મુજબ, ઈરાનના સુપ્રીમ લીડર મુજતબા ખામેનેઈના સલાહકાર યાહ્યા રહીમ સફાવીએ ગુરુવારે જણાવ્યું હતું કે સંઘર્ષ પહેલેથી જ પર્શિયન ગલ્ફ અને હોર્મુઝ સ્ટ્રેટથી નીકળીને લાલ સમુદ્ર સુધી ફેલાઈ ગયો છે. જો ફરીથી હુમલો થશે, તો યુદ્ધનો વ્યાપ વધુ વધી શકે છે. જો આવું થાય છે, તો ભારત અને ચીન જેવા મોટા તેલની આયાત કરતા દેશો પર તેની મોટી અસર પડી શકે છે. હિન્દ મહાસાગર યુરોપ અને પશ્ચિમ એશિયાને એશિયાઈ દેશો સાથે જોડવા માટે અત્યંત મહત્વપૂર્ણ છે. સમુદ્રમાં તણાવ વધવાથી પશ્ચિમ એશિયામાંથી તેલ લાવતાં જહાજો પર હુમલાની આશંકા વધી જશે. દાવો- માર્ચમાં હિન્દ મહાસાગર સુધી પહોંચ્યું હતું યુદ્ધ ઈરાનના જણાવ્યા મુજબ, આ વર્ષે માર્ચમાં પણ યુદ્ધની અસર હિન્દ મહાસાગર સુધી પહોંચી હતી. તે સમયે અમેરિકાના હુમલામાં ઈરાનનું યુદ્ધજહાજ IRIS દેના ડૂબી ગયું હતું. આ ઘટના શ્રીલંકાના કિનારા નજીક બની હતી. રોઇટર્સ મુજબ, ઈરાની ફ્રિગેટ શ્રીલંકાના ગાલે શહેરથી આશરે 19 નોટિકલ માઇલ દૂર ડૂબ્યું હતું. આ સ્થળ શ્રીલંકાના વિશેષ આર્થિક ક્ષેત્ર એટલે કે EEZમાં આવે છે. UNમાં ટ્રમ્પ પર ભડક્યા પજશકિયાન ઈરાનની આ ચેતવણી એવા સમયે આવી છે, જ્યારે રાષ્ટ્રપતિ મસૂદ પજશકિયાન UN મહાસભામાં ભાગ લેવા માટે અમેરિકા પહોંચ્યા છે. UNમાં પજશકિયાને અમેરિકી રાષ્ટ્રપતિ ટ્રમ્પના વલણને ધાક જમાવનારી માનસિકતા ગણાવી હતી. પજશકિયાને કહ્યું કે ઈરાન અમેરિકાના દબાણ સામે ઝૂકશે નહીં. UN મહાસભામાં પોતાના ભાષણ દરમિયાન પજશકિયાને કહ્યું કે ધમકીઓથી ઈરાનનો ઈરાદો વધુ મજબૂત થશે. જોકે, તેમણે યુદ્ધ સમાપ્ત કરવા માટે વાતચીતનો માર્ગ ખુલ્લો રાખવાની વાત પણ કરી હતી. ટ્રમ્પે કહ્યું- સમજૂતી કરો નહીં તો ખતમ કરી નાખીશું અમેરિકાના રાષ્ટ્રપતિ ટ્રમ્પે UN મહાસભામાં ઈરાનને ફરી એકવાર ખતમ કરવાની ધમકી આપી છે. મંગળવારે UNમાં પોતાના ભાષણમાં તેમણે કહ્યું- અમેરિકા પાસે બે રસ્તા છે- ઈરાન સાથે સમજૂતી કરવી અથવા પોતાને ખતમ કરી નાખે. તેમણે વધુમાં કહ્યું, ‘મેં યુરોપિયન દેશોને જણાવ્યું હતું કે ઈરાન બેલિસ્ટિક મિસાઇલોના નામે પરમાણુ બોમ્બ બનાવી રહ્યું હતું. જ્યારે અન્ય નેતાઓ માત્ર રાહ જોઈ રહ્યા હતા, ત્યારે અમેરિકાએ ઈરાન વિરુદ્ધ કાર્યવાહી કરીને તેને રોક્યું.’ અમેરિકા-ઈરાન યુદ્ધ શરૂ થયા બાદથી ટ્રમ્પ છેલ્લા 7 મહિનામાં 10થી વધુ વખત ઈરાનને તબાહ કરવાની ધમકી આપી ચૂક્યા છે, પરંતુ દર વખતે તેમને પીછેહઠ કરીને વાતચીતનો માર્ગ અપનાવવો પડ્યો. ઈરાની સેનાએ કહ્યું- ટ્રમ્પે UNના મંચનો ખોટો ઉપયોગ કર્યો આ પહેલાં ઈરાનની સેનાએ પણ ટ્રમ્પને નિશાન બનાવ્યા હતા. ઈરાની સશસ્ત્ર દળોએ આરોપ લગાવ્યો કે ટ્રમ્પે ઈરાન વિરુદ્ધ અમેરિકાની આક્રમકતાને યોગ્ય ઠેરવવા માટે UNના મંચનો ઉપયોગ કર્યો. અલ જઝીરા અનુસાર, ઈરાની સેનાએ કહ્યું કે ટ્રમ્પ દ્વારા વારંવાર આપવામાં આવી રહેલી ધમકીઓ તાકાતની નિશાની નહીં, પરંતુ વ્યૂહાત્મક હતાશાની નિશાની છે. ઈરાને હોર્મુઝ સ્ટ્રેટ ખોલવાની શરતો જણાવી ઈરાને હોર્મુઝ સ્ટ્રેટ ફરીથી ખોલવા માટે પોતાની શરતો અમેરિકા સમક્ષ મૂકી છે. અલ જઝીરાના અહેવાલ મુજબ, અરાઘચીએ અમેરિકન અધિકારીઓ સમક્ષ આ શરતો રજૂ કરી. ઈરાનની માંગ છે કે અમેરિકા તાત્કાલિક નેવીની નાકાબંધી હટાવે અને વિદેશોમાં ફ્રીઝ કરાયેલી ઈરાની સંપત્તિઓ મુક્ત કરે. સાથે જ લેબનોન સહિત તમામ મોરચાઓ પર યુદ્ધ સમાપ્ત કરે. હોર્મુઝ સ્ટ્રેટ વિશ્વના સૌથી મહત્વપૂર્ણ તેલ પરિવહન માર્ગોમાંથી એક છે. પર્શિયન ગલ્ફ અને ઓમાનની ખાડીને જોડતા આ જળમાર્ગેથી મોટા પ્રમાણમાં ક્રુડ ઓઈલ અને ગેસનું પરિવહન થાય છે.