કલ્પસર પ્રોજેક્ટને લઈને દિલ્હીમાં કેન્દ્ર સરકાર, ગુજરાત સરકાર અને નેધરલેન્ડ વચ્ચે મહત્વપૂર્ણ MoU થયો છે. વર્ષોથી ચર્ચામાં રહેલા અને એક સમયે ‘અશક્ય’ ગણાવીને પડતા મૂકાયેલા આ પ્રોજેક્ટને હવે નવી દિશામાં આગળ વધારવાની કવાયત શરૂ થઈ છે. આ પ્રોજેક્ટ માટે નેધરલેન્ડની ટેક્નિકલ નિષ્ણાત સંસ્થાઓ સાથે કરાર કરવામાં આવ્યો છે.

9 જિલ્લાઓમાં 10 લાખ હેક્ટર સિંચાઈનું લક્ષ્ય

ગુજરાતના જળમંત્રી ઈશ્વરભાઈ પટેલે જણાવ્યું કે આ પ્રોજેક્ટથી રાજ્યના જે 9 જિલ્લાઓમાં દુષ્કાળની સ્થિતિ રહે છે, ત્યાં પાણી પહોંચાડવાનું આયોજન છે. તેમના જણાવ્યા મુજબ આ વિસ્તારોમાં આશરે 10 લાખ હેક્ટર જમીનને સિંચાઈનું પાણી મળી શકે છે. આ દાવાને પગલે કલ્પસર પ્રોજેક્ટને ગુજરાતના પાણી વ્યવસ્થાપન માટે મહત્વપૂર્ણ ગણાવવામાં આવી રહ્યો છે.

નેધરલેન્ડની સંસ્થાઓ આપશે ટેક્નિકલ મદદ

MoU હેઠળ નેધરલેન્ડની જાણીતી સંસ્થા Deltares કલ્પસર માટે અદ્યતન કોસ્ટલ એન્જિનિયરિંગ અને હાઇડ્રોલિક મોડેલિંગમાં ટેક્નિકલ સહાય આપશે. જ્યારે TU Delft ભારતીય એન્જિનિયરો અને અધિકારીઓ માટે ક્ષમતા નિર્માણ તથા વિશેષ તાલીમની જવાબદારી સંભાળશે.

2026થી 2030નો રોડમેપ તૈયાર

જળશક્તિ મંત્રી સી.આર. પાટીલે જણાવ્યું કે વડાપ્રધાનના નિર્દેશ બાદ કલ્પસર યોજનાનો 2026થી 2030 સુધીનો રોડમેપ તૈયાર કરવામાં આવ્યો છે. તેમનો દાવો છે કે આ યોજના વિશ્વનું સૌથી મોટું મીઠા પાણીનું તટીય જળાશય બનાવવાના પ્રયાસ સાથે જોડાયેલી છે.

‘દેશ અને ગુજરાત માટે મહત્વની યોજના’

સી.આર. પાટીલે કહ્યું કે એક સમયે આ યોજનાને અશક્ય માનીને છોડી દેવામાં આવી હતી, પરંતુ હવે તેને આગળ વધારવામાં આવી રહી છે. ગુજરાત સરકારના મંત્રી ઈશ્વરભાઈ પટેલે પણ MoUને ગુજરાત માટે ગૌરવની વાત ગણાવી અને સૂકા વિસ્તારો સુધી સિંચાઈનું પાણી પહોંચાડવાની આશા વ્યક્ત કરી.

કલ્પસર પ્રોજેક્ટને લઈને હવે શું?

નેધરલેન્ડની ટેક્નિકલ નિષ્ણાતી, 2026થી 2030નો રોડમેપ અને 9 જિલ્લાઓમાં 10 લાખ હેક્ટર સિંચાઈના દાવા વચ્ચે હવે કલ્પસર પ્રોજેક્ટ ફરી ચર્ચાના કેન્દ્રમાં આવ્યો છે. આગામી તબક્કામાં ટેક્નિકલ અભ્યાસ અને આયોજન બાદ પ્રોજેક્ટને આગળ વધારવાની દિશામાં કામગીરી થવાની છે.  

આ પણ વાંચો   :   New Delhi: જો જ્ઞાનેશ કુમાર 48 કલાકમાં રાજીનામુ નહીં આપે તો જંતર મંતર 2.0 શરુ કરવાનું CJPનું એલાન