ભારત અને વેસ્ટ ઈન્ડિઝ વચ્ચેની 3 મેચની વનડે સીરિઝની શરૂઆત 27 સપ્ટેમ્બરથી થવા જઈ રહી છે.પ્રથમ મેચ તિરુવનંતપુરમના ગ્રીનફિલ્ડ ઈન્ટરનેશનલ સ્ટેડિયમમાં રમાશે.આ મુકાબલા પર ભારતીય ટીમના પ્રદર્શનની સાથે વિરાટ કોહલી પર પણ ખાસ નજર રહેશે.વિરાટ કોહલી માટે આ શ્રેણી મહત્વપૂર્ણ છે, કારણ કે તે આગામી વનડે ક્રિકેટના પડકારો માટે પોતાની તૈયારીઓને વધુ મજબૂત કરવા માગશે.ખાસ વાત એ છે કે તિરુવનંતપુરમના મેદાન પર કોહલીનો વનડે રેકોર્ડ શાનદાર રહ્યો છે. તેણે અહીં અત્યાર સુધી 2 વનડે મેચ રમી છે અને બંને મેચમાં તે અણનમ રહ્યો છે.

તિરુવનંતપુરમમાં કોહલીનો શાનદાર રેકોર્ડ

વિરાટ કોહલીએ ગ્રીનફિલ્ડ ઈન્ટરનેશનલ સ્ટેડિયમમાં પ્રથમ વનડે મેચ 2018માં વેસ્ટ ઈન્ડિઝ સામે રમી હતી. આ મેચમાં કોહલીએ અણનમ 33 રન બનાવ્યા હતા.ત્યારબાદ તેણે આ મેદાન પર પોતાની બીજી અને અત્યાર સુધીની છેલ્લી વનડે મેચ 2023માં શ્રીલંકા સામે રમી હતી. આ મુકાબલામાં કોહલીએ શાનદાર સદી ફટકારી હતી.કોહલીએ શ્રીલંકા સામે માત્ર 110 બોલમાં અણનમ 166 રન બનાવ્યા હતા. તેની ઇનિંગ્સમાં 13 ચોગ્ગા અને 8 છગ્ગાનો સમાવેશ થયો હતો. આ પ્રદર્શનના કારણે તિરુવનંતપુરમમાં કોહલીની યાદગાર ઇનિંગ્સમાં આ મેચનો ખાસ સમાવેશ થાય છે.આ રીતે ગ્રીનફિલ્ડ સ્ટેડિયમમાં કોહલીએ અત્યાર સુધી 2 વનડે મેચમાં કુલ 199 રન બનાવ્યા છે. સૌથી મહત્વની વાત એ છે કે બંને મેચમાં તેનો વિકેટ ગુમાવ્યો નથી.

વેસ્ટ ઈન્ડિઝ સામે પણ કોહલીનો દબદબો

માત્ર તિરુવનંતપુરમમાં જ નહીં, પરંતુ વેસ્ટ ઈન્ડિઝ સામે પણ વિરાટ કોહલીનો વનડે રેકોર્ડ મજબૂત રહ્યો છે.કોહલીએ વેસ્ટ ઈન્ડિઝ સામે અત્યાર સુધી 43 વનડે મેચની 41 ઇનિંગ્સમાં 66.5ની સરેરાશથી 2261 રન બનાવ્યા છે. આ દરમિયાન તેના બેટમાંથી 9 સદી અને 11 અડધી સદી જોવા મળી છે.ભારતમાં વેસ્ટ ઈન્ડિઝ સામે રમતી વખતે પણ કોહલીના આંકડા નોંધપાત્ર છે. તેણે ઘરઆંગણે વેસ્ટ ઈન્ડિઝ સામે 23 વનડે મેચમાં 63.25ની સરેરાશથી 1265 રન બનાવ્યા છે.

હવે ફરી કોહલી પર નજર

તિરુવનંતપુરમમાં વેસ્ટ ઈન્ડિઝ સામેની પ્રથમ વનડેમાં કોહલીનો આ શાનદાર રેકોર્ડ ફરી ચર્ચામાં છે. એક તરફ ભારતીય ટીમ સીરિઝની સારી શરૂઆત કરવા માગશે, તો બીજી તરફ ચાહકોની નજર કોહલીની બેટિંગ પર રહેશે.કોહલી આ મેદાન પર અત્યાર સુધી બંને વખત અણનમ રહ્યો છે. હવે 27 સપ્ટેમ્બરની મેચમાં તે પોતાના આ રેકોર્ડને વધુ યાદગાર બનાવી શકે છે કે નહીં, તેના પર સૌની નજર રહેશે.

આ પણ વાંચો – Virender Sehwag : ‘લોકો તમને નફરત કરશે… સેહવાગે પુત્ર આર્યવીરને કેમ કહ્યું આવું?