ડિરેક્ટરોરેટ ઓફ રેવન્યુ ઈન્ટેલિજન્સ (DRI) ની ટીમે સોનાની આંતરરાષ્ટ્રીય તસ્કરી વિરુદ્ધ એક મોટી સફળ કાર્યવાહી કરી છે. ચોક્કસ ગુપ્ત બાતમીના આધારે DRI ની ટીમે મુંબઈના છત્રપતિ શિવાજી મહારાજ આંતરરાષ્ટ્રીય એરપોર્ટ પર વોચ ગોઠવીને દુબઈથી આવેલા ત્રણ શકમંદ મુસાફરોને અટકાવ્યા હતા. આ મુસાફરોના સામાનની બારીકાઈથી તપાસ કરવામાં આવતાં કરોડો રૂપિયાની કિંમતનું વિદેશી મૂળનું ગેરકાયદેસર સોનું મળી આવ્યું હતું.

મુંબઈ એરપોર્ટ પરથી વિદેશી સોનું જપ્ત

તપાસ અધિકારીઓ ત્યારે ચોંકી ઉઠ્યા હતા જ્યારે તસ્કરોની અનોખી મોડસ ઓપરેન્ડી સામે આવી હતી. આરોપીઓએ કસ્ટમ્સ ચેકિંગથી બચવા માટે સોનાને પાવડર સ્વરૂપમાં ફેરવીને ખાદ્ય ચીજો અને પેકિંગના સામાનમાં ચાલાકીપૂર્વક છુપાવ્યું હતું. DRI એ મુસાફરો પાસેથી કુલ 9.40 કિલોગ્રામ વિદેશી મૂળનું સોનું કબ્જે કર્યું છે, જેની વર્તમાન આંતરરાષ્ટ્રીય અને સ્થાનિક બજાર કિંમત આશરે રૂ. 14.81 કરોડ આંકવામાં આવી છે.

દુબઈથી આવેલા 3 મુસાફરો ગિરફ્તાર

આટલા મોટા પ્રમાણમાં બિનઅધિકૃત સોનાનો જથ્થો મળી આવતાં DRI એ ત્રણેય મુસાફરોની કસ્ટમ્સ એક્ટ, 1962 ની સંબંધિત કલમો હેઠળ વિધિવત ધરપકડ કરી લીધી છે. આ સોનું ભારતમાં કોને સપ્લાય કરવાનું હતું અને આ તસ્કરી પાછળ દુબઈ કે ભારતમાં સક્રિય કઈ મોટી સિન્ડિકેટ કામ કરી રહી છે તે દિશામાં DRI ના અધિકારીઓએ આગળની ઊંડાણપૂર્વકની તપાસ હાથ ધરી છે.

આ પણ વાંચો: Gandhinagar: મહાનગરપાલિકા ચૂંટણી માટે ભાજપે 32 ઉમેદવારોના નામ કર્યા જાહેર