અમરેલી જિલ્લાના બાબરા તાલુકાના મોટા દેવળિયા ગામમાંથી એક અત્યંત હૃદયદ્રાવક સમાચાર સામે આવ્યા છે. મોટા દેવળિયા ખાતે પ્રસંગોપાત કામ પતાવીને ન્હાવા માટે પડેલા 4 યુવકો પાણીમાં ડૂબી જવાથી મોતને ભેટ્યા છે. આ અકસ્માતને કારણે સમગ્ર પંથકમાં અને વાલ્મિકી સમાજમાં ભારે અરેરાટી વ્યાપી ગઈ છે.

ઘટનાની વિગતો મુજબ, ગણેશ વિસર્જન કરવા ગયેલા કેટલાક લોકોને ચેકડેમની કાંઠે માત્ર કપડાં પડેલા જોવા મળ્યા હતા, જેથી તેમને શંકા ગઈ હતી. તેમણે તુરંત જ આ અંગે પોલીસને જાણ કરી હતી. સ્થાનિક લોકો અને પોલીસની સયુક્ત મદદથી ચેકડેમમાંથી ભારે જહેમત બાદ ચારેય યુવકોના મૃતદેહો બહાર કાઢવામાં આવ્યા હતા.

જેમાંથી પ્રથમ બે યુવકો મોટા દેવળિયાના સ્થાનિક હતા, જ્યારે બાકીના બે યુવકો નવાગઢ, જેતપુરના વતની હતા. એકસાથે ચાર યુવકોના મૃત્યુથી મૃતકોના પરિવારજનો પર આભ તૂટી પડ્યું છે.

આ પણ વાંચો: LIVEGanesh Visarjan Live: અરવલ્લીમાં ભક્તિસભર ગણેશ વિસર્જન, મેઘરજ શોભાયાત્રામાં મંત્રી PC બરંડા જોડાયા