વડોદરા જિલ્લાના કરજણ તાલુકામાંથી એક ચિંતાજનક સમાચાર સામે આવ્યા છે. કરજણના પિંગલવાળા ગામે આવેલી ઢાઢર નદીમાં ગણેશ વિસર્જન કરવા માટે મોટી સંખ્યામાં લોકો એકત્રિત થયા હતા. આ દરમિયાન વિસર્જન વિધિ કે સ્નાન ટાણે અચાનક 3 યુવાનો પાણીમાં ડૂબી જવાની ગંભીર ઘટના બની હતી.

બે યુવાનોનો આબાદ બચાવ, એક લાપતા

નદીમાં 3 યુવાનો ડૂબવાની આ દુર્ઘટનામાં સમયસૂચકતા અને સ્થાનિકોની મદદથી 2 યુવાનોને સુરક્ષિત રીતે બહાર કાઢી લેવામાં આવ્યા છે, જેથી તેમનો આબાદ બચાવ થયો છે. જોકે, હજુ સુધી એક યુવાન પાણીમાં લાપતા છે. પ્રાથમિક માહિતી મુજબ, ડૂબેલો અને લાપતા થયેલા આ યુવાન તાલુકાના જ માનપુરા ગામનો રહેવાસી હોવાનું સામે આવ્યું છે.

પોલીસ અને ફાયર વિભાગ દ્વારા રેસ્ક્યુ ઓપરેશન

ઘટનાની જાણ થતાં જ કરજણ પોલીસ અને ફાયર વિભાગનો કાફલો તાત્કાલિક ઘટના સ્થળે દોડી આવ્યો હતો. લાપતા થયેલા યુવાનની શોધખોળ કરવા માટે ફાયર વિભાગની ટીમ દ્વારા ઢાઢર નદીમાં સઘન રેસ્ક્યુ ઓપરેશન ચલાવવામાં આવી રહ્યું છે.

આ પણ વાંચો: Vadodaraમાં નગ્ન વીડિયો કેસમાં ધરપકડ છતાં ફાયર કર્મચારી ફરજ પર હાજર દેખાતા વિવાદ!