હિંમતનગરના ટાવર રોડ નજીક આવેલા નવા બજાર અને ગાંધી રોડ પર પાલિકા દ્વારા કામગીરી શરૂ કરાઈ છે. ટ્રેન્ચ સફાઈ અને વીજ કનેક્શનના કામને કારણે આ વિસ્તારના બજારો બે દિવસ બંધ રહેશે. શુક્રવાર રાતથી શરૂ થયેલી આ કામગીરી શનિવાર અને રવિવાર સુધી ચાલશે. વેપારીઓએ ત્રણ વર્ષથી રોડ બન્યા પછી પણ લાઈટો ચાલુ ન થવા અને અંડરગ્રાઉન્ડ વાયરિંગના કનેક્શન ન મળવાને કારણે વિરોધ કર્યો હતો. તેમણે બજાર બંધ રાખી પાલિકામાં રજૂઆત કરી હતી. પાલિકાએ 30 સપ્ટેમ્બર સુધીમાં સમસ્યા ઉકેલવાની ખાતરી આપી હતી. શનિવાર સવારથી જેસીબી વડે ટ્રેંચના ઢાંકણ ખોલવામાં આવ્યા છે. વીજ થાંભલા, દુકાનોના વીજ કનેક્શન, સફાઈ અને પાણીની પાઈપલાઈનનું કામ ચાલી રહ્યું છે. વીજ કનેક્શન અંડરગ્રાઉન્ડ કરવાના હોવાથી રવિવારે આ વિસ્તારમાં વીજળી બંધ રહેશે.